MƏDƏNİYYƏT
“OĞURLANMIŞ TARİX, SOYQIRIM” KİTABI TƏQDİM OLUNMUŞDUR
AZƏRTAC xəbər verir ki, noyabrın 7-də Azərbaycanda Atatürk Mərkəzində (AzAtaM) Beynəlxalq Diaspor Mərkəzinin departament rəhbəri, müstəqil tədqiqatçı Sənubər Sarallının “Oğurlanmış tarix, soyqırım” kitabının təqdimat mərasimi keçirilmişdir.
Rus dilində nəşr olunmuş kitabda ermənilərin azərbaycanlılara məxsus tarixi toponimləri dəyişdirmələrindən, Dağlıq Qarabağ münaqişəsi başlayandan sonra isə soydaşlarımızın öz ata-baba torpaqlarından kütləvi surətdə deportasiya olunmasından bəhs edilir. 704 səhifədən ibarət kitabda dəhşətli işgəncələrə məruz qalmış 600-dən çox günahsız azərbaycanlının faciəli taleyinin xronoloji salnaməsi verilmişdir.
AzAtaM-ın rəhbəri, Milli Məclisin mədəniyyət məsələləri daimi komissiyasının sədri, AMEA-nın müxbir üzvü Nizami Cəfərov erməni millətçilərinin tarixin müxtəlif mərhələlərində azərbaycanlılara qarşı soyqırımı siyasəti yeritdiyini bildirmişdir. O, ermənilərin zaman-zaman dinc türk-azərbaycanlı əhaliyə divan tutduqlarını, onları tarixi-etnik torpaqlarından deportasiyaya məruz qoyduqlarını diqqətə çatdırmışdır. N.Cəfərov vətəndaş təəssübü ilə yazılmış bu kitabın bir çox dillərə tərcümə edilməsinin vacibliyini vurğulamışdır.
Milli Məclisin deputatları Gülər Əhmədova, Gültəkin Hacıyeva, Fəzail İbrahimli və digər çıxış edənlər azərbaycanlılara qarşı soqırım siyasəti yeridən, dinc əhaliyə divan tutan, onları tarixi-etnik torpaqlarından deportasiyaya məruz qoyan məkrli, qəddar düşmənin ifşasında kitabın əhəmiyyətindən danışmışlar.
Sonda Sənubər Sarallı tədbir iştirakçılarına və kitabın ərsəyə gəlməsində ona dəstək olan insanlara minnətdarlığını bildirmişdir.