Respublika Gənclər Kitabxanasında ilk yarımilliyin hesabat-iclası keçirilib
Bakı, 6 iyul, AZƏRTAC
Cəfər Cabbarlı adına Respublika Gənclər Kitabxanasında direktor Aslan Cəfərovun rəhbərliyi ilə ilk yarımilliyin hesabat-iclası keçirilib. İclasın keçirilməsində məqsəd görülmüş işlərin və növbəti yarım illik üçün nəzərdə tutulan iş planının müzakirəsi olub.
AZƏRTAC xəbər verir ki, kitabxananın direktoru Aslan Cəfərov çıxış edərək, Prezident İlham Əliyevin son yarım ildə mədəniyyət sahəsində keçirdiyi islahatlar, imzaladığı sərəncamlar haqqında məlumat verib. O, Prezidentin Sərəncamı ilə bu ilin ölkəmizdə “Şuşa İli” elan edilməsinin, ədəbiyyat inciləri olan Xurşidbanu Natəvanın 190, Əhməd Cavadın 130, musiqi korifeyləri Fikrət Əmirov və Rauf Hacıyevin 100 illik yubileyləri münasibətilə Tədbirlər Planının hazırlanıb həyata keçirilməsinin Azərbaycan mədəniyyətinə, ədəbiyyatına, musiqisinə olan yüksək dəyərin təcəssümü olduğunu bildirib. Direktor Respublika Gənclər Kitabxanasının özfəaliyyət istiqamətlərinin ölkəmizdə mədəniyyət sahəsində imzalanan sərəncamlara və bu sərəncamlardan irəli gələn tədbirlər planına uyğun olaraq təşkil edildiyini vurğulayıb.
Müzakirə ediləcək məsələlər sırasında Aslan Cəfərov ilk növbədə dövlət başçısı tərəfindən ölkəmizdə elan edilən “Şuşa İli” çərçivəsində Respublika Gənclər Kitabxanasının əməkdaşlarının Azərbaycanın mədəniyyət paytaxtı Şuşada keçirilən V “Xarıbülbül” Beynəlxalq Folklor Festivalı ilə əlaqədar təşkil edilən Şuşa səfəri haqqında danışıb.
İclasda altı ay müddətində kitabxanada aparılan islahatlar - yeni ştat cədvəlinin tərtib edilməsi, yeni şöbələrin yaradılması, yeni öhdəliklərin müəyyən edilməsi haqqında məlumat verilib. Kitabxanada aparılan təmir işləri ilə əlaqədar şöbələrin daha geniş və peşəkar mühitdə çalışmaları üçün yeni imkanların yaradıldığı vurğulanıb.
Son altı ay müddətində kitabxananın rəsmi veb-saytının müasir informasiya meyarlarına uyğun olaraq tamamilə yenilənməsi məsələsi diqqətə çatdırılıb. Yeni yaradılan sayt özündə yeni bölmələr, elektron xidmətlər və istifadəçilərlə virtual ünsiyyət üçün bir sıra yeni imkanlar cəmləyir. Müzakirələr zamanı yeni yaradılan saytın ümumilikdə müasir kitabxana xidmətlərinin göstərilməsinə istiqamətlənməsi vurğulanıb.
Bildirilib ki, kitabxana sayt xidmətləri ilə yanaşı, sosial şəbəkələrdə olan fəaliyyətini də daim diqqət mərkəzində saxlamış və hazırda kitabxananın instaqram səhifəsi gündəlik olaraq yeni maraqlı məlumatlarla yenilənərək, 14.200-dən çox istifadəçiyə xidmət göstərir.
Hesabat iclasında sözügedən müddət ərzində kitabxananın dörd əməkdaşının kompüter proqramları biliklərinin təkmilləşdirilməsi məqsədilə kitabxananın hesabına tədris kurslarına yönləndirilməsi məsələsinə də toxunulub. Bu əməkdaşlar müasir kitabxanaların tələbatına cavab verən poliqrafik dizayn, təqdimat proqramlarının tədrisinə cəlb ediliblər.
İclasda kitabxananın fondunu yeni nəşrlərlə zənginləşdirmək və komplektləşdirmək məqsədilə həyata keçirdiyi “Nəşrlərin satınalınması müsabiqəsi” haqqında da danışılıb. Bir ay müddətində davam edən müsabiqəyə 14 nəşriyyat və üç müəllifdən 199 adda 3096 nüsxə kitab daxil olub. Müsabiqəyə daxil olan kitablar arasında ali məktəb dərslikləri, müxtəlif mövzuları əhatə edən ensiklopediyalar, Azərbaycan və xarici ədəbiyyat nümunələri, şanlı Zəfər tarixinə həsr olunan əsərlər üstünlük təşkil edir. Müsabiqənin təşkilində şəffaflığı, səmərəliliyi və obyektivliyi təmin etmək məqsədilə müsabiqəni kitabxana tərəfindən yaradılan Nəşriyyat Məhsullarının Satınalınması üzrə Komissiya həyata keçirib.
İclasda Respublika Gənclər Kitabxanasının nəşrə hazırladığı “Şuşa sən azadsan!” kitabı haqqında da məlumat verilib. Sözügedən kitabda Azərbaycanın şanlı Zəfər tarixi - 44 günlük müharibəyə həsr olunmuş, 20-ə yaxın gənc yazarın qələminin məhsulu olan 30-dan çox ədəbiyyat nümunələri toplanıb. Kitabın “Ön söz”ünün müəllifi Azərbaycan Yazıçılar Birliyinin sədr müavini, “525-ci qəzet”in baş redaktoru, Əməkdar mədəniyyət işçisi Rəşad Məcid, tərtibçi və redaktoru Azərbaycan Yazıçılar Birliyinin Gənclər Şurasının sədri Fərid Hüseyndir.
Direktor Aslan Cəfərov Gənclər kitabxanasının fəaliyyətinin əsas istiqamətlərindən birini təşkil edən gənclərdə hərbi-vətənpərvərlik ruhunun yüksəldilməsi məsələsinə toxunaraq, kitabxana əməkdaşları tərəfindən bizə şanlı Zəfər tarixini yaşadan şəhid və qazilərimiz, müharibə iştirakçıları haqqında hazırlanan videomateriallar, məlumat bülletenləri haqqında da məlumat verib.
Bölmənin digər xəbərləri
