CƏMİYYƏT
Tovuz döyüşlərində qazanılan təcrübələr Vətən müharibəsindən əvvəl ciddi başlanğıc oldu
![Tovuz döyüşlərində qazanılan təcrübələr Vətən müharibəsindən əvvəl ciddi başlanğıc oldu](/files/2023/2/1200x630/1689273333627056600_1200x630.jpg)
Bakı, 13 iyul, AZƏRTAC
Tovuz döyüşləri Ermənistanın ordu birləşmələrinin Azərbaycan dövlət sərhədində törətdiyi təxribatlarla başladı. Əgər bu bölgəyə diqqət yetirsək respublikanın bir sıra strateji əhəmiyyətli logistika yolları, enerji boru xətləri burdan keçməkdədir. Ola biləcək hər hansı bir uğursuzluq birbaşa ölkəmizin blokada vəziyyətinə gətirilib çıxarılmasına səbəb ola bilərdi.
Bu sözləri AZƏRTAC-a açıqlamasında hərbi analitik, “Türkiyə Universitetləri Məzunları” İctimai Birliyi sədrinin baş müşaviri Alparslan İmamqulu deyib.
“Təbii ki, 2020-ci ilin iyul hadisələri zamanı düşmən layiqli cavabını almış oldu. Mən deyərdim ki, bu döyüşlərdə əldə olunan təcrübələr, mənəvi-psixoloji vəziyyətdəki yüksəklik, ordu, xalq və dövlət həmrəyliyi 44 günlük Vətən müharibəsindən əvvəl ciddi bir başlanğıc idi. Nəticə etibarı ilə Tovuzda başlanan təxribatın cavabı düşmənə layiqincə Şuşada verilmiş oldu. Otuz illik işğal altında olan digər torpaqlarımız da azad olundu”, - deyə A.İmamqulu bildirib.