Minillik tarix, zəngin mədəniyyət: İçərişəhərdə Şanlıurfa Mədəniyyəti Günləri
Bakı, 5 sentyabr, AZƏRTAC
Bu gün İçərişəhərin Qoşa qala meydanında Şanlıurfanın zəngin tarixi və mədəni irsini tanıtmaq məqsədilə “Tarixin qəlbi Xəzərin sahilində: Şanlıurfa Mədəniyyəti Günləri”nin açılışı olub.
AZƏRTAC xəbər verir ki, ikigünlük proqram çərçivəsində Şanlıurfanın minilliklərə söykənən tarixi, mədəni irsi, milli mətbəxi, ənənəvi sənətkarlıq nümunələri, folkloru və musiqisi Bakı sakinlərinə və şəhərin qonaqlarına təqdim ediləcək.
Bakı Yunus Əmrə İnstitutunun ev sahibliyi, Türkiyə–Azərbaycan İş Adamları və Sənayeçiləri İctimai Birliyinin (TÜİB) dəstəyi, Şanlıurfa Böyükşəhər Bələdiyyəsinin töhfələri və “İçərişəhər” Dövlət Tarix-Memarlıq Qoruğu İdarəsi ilə əməkdaşlıq çərçivəsində təşkil olunan tədbir Azərbaycan ilə Türkiyə arasında mövcud olan dostluq və qardaşlıq münasibətlərinin daha da möhkəmlənməsinə xidmət edir.
Tədbirin açılışında “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud, Şanlıurfa Böyükşəhər Bələdiyyəsinin sədri Mehmet Kasım Gülpınar, TÜİB İdarə Heyətinin sədri Hüseyn Böyükfırat, Yunus Emre İnstitutunun sədr müavini Ömər Yıldız, Samsat Böyükşəhər Bələdiyyəsinin sədri Halil Fırat çıxış ediblər.
Bildirilib ki, Azərbaycan və Türkiyə arasında tarixi köklərə əsaslanan dostluq və qardaşlıq münasibətləri bütün istiqamətlərdə uğurla inkişaf edir. Bu münasibətlərin möhkəmlənməsində mədəniyyət və incəsənət sahəsində həyata keçirilən birgə layihələrin xüsusi əhəmiyyət daşıdığı vurğulanıb.
Çıxışlarda Şanlıurfanın bəşər sivilizasiyasının mühüm mərkəzlərindən biri olduğu, zəngin tarixi, mədəni irsi və özünəməxsus ənənələri ilə seçildiyi diqqətə çatdırılıb. Şəhərin tarixi-mədəni dəyərlərinin Bakıda təqdim edilməsinin Azərbaycan ictimaiyyətinin Türkiyənin qədim mədəniyyət mərkəzlərindən biri ilə daha yaxından tanış olmasına imkan yaratdığı bildirilib.
Qeyd olunub ki, İçərişəhər kimi qədim tarixə malik məkanda "Şanlıurfa Mədəniyyəti Günlərinin" keçirilməsi iki şəhərin tarixi və mədəni irsi arasında maraqlı paralellər yaratmaqla yanaşı, xalqlarımızın ortaq dəyərlərinin nümayişi baxımından da əhəmiyyətlidir.
Tədbirdə Azərbaycan və Türkiyə arasında mədəni əlaqələrin daha da genişləndirilməsinin, qarşılıqlı mədəni layihələrin sayının artırılmasının və hər iki ölkənin zəngin irsinin beynəlxalq səviyyədə təbliğinin vacibliyi vurğulanıb.
Çıxışlardan sonra tədbirin təşkilində göstərdikləri dəstəyə görə təşkilatçılara və tərəfdaş qurumların nümayəndələrinə təşəkkür sertifikatları təqdim olunub.
Daha sonra Şanlıurfanın zəngin folklor və musiqi ənənələrini əks etdirən konsert və xalq rəqsləri nümayiş olunub. Bununla yanaşı, ziyarətçilərə bölgənin əsrlər boyu formalaşmış mədəni ənənələri və sənət nümunələri təqdim edilib.
Proqram çərçivəsində Şanlıurfanın ənənəvi sənətkarlıq nümunələri, milli mətbəxi, folkloru və musiqisi təqdim olunur, ziyarətçilər şəhərin qədim tarixi və mədəni irsi ilə yaxından tanış olmaq imkanı əldə edirlər.
Həmçinin İçərişəhərdə Göbeklitepe, Karahantepe, eləcə də Şanlıurfanın tarixi, təbii və mədəni dəyərlərini əks etdirən fotoşəkil sərgisi təşkil olunub.
“Tarixin qəlbi Xəzərin sahilində: Şanlıurfa Mədəniyyəti Günləri” sentyabrın 6-dək davam edəcək.
Qeyd edək ki, Şanlıurfa qədim tarixi və zəngin irsi ilə Türkiyənin mühüm mədəniyyət və turizm mərkəzlərindən biridir. Dünyanın ən qədim monumental tikililərindən hesab olunan Göbeklitepe və Karahantepe, eləcə də tarixi Harran və şəhərin ana simvollarından olan Balıklıgöl Şanlıurfanın zəngin tarixi irsinin əsas nümunələrindəndir. Bölgə, həmçinin özünəməxsus mətbəxi və musiqi ənənələri ilə seçilir.
Bölmənin digər xəbərləri
