Tacikistandan olan gənc sənətçi: Azərbaycan musiqisində doğma nəsə hiss edirəm
Bakı, 1 oktyabr, AZƏRTAC
Tacikistandan olan gənc sənətçi Tamanno Baxromova üçün Azərbaycan musiqisi sadəcə yaradıcılıq repertuarının bir hissəsi deyil. Bu musiqi onun ailə kökləri, uşaqlıq xatirələri və Azərbaycan mədəniyyətini daha dərindən öyrənmək arzusu ilə bağlıdır.
AZƏRTAC-ın müxbiri Tacikistan-Rusiya (Slavyan) Universitetinin Jurnalistika fakültəsinin tələbəsi, müğənni, 2021-ci və 2024-cü illərdə keçirilmiş “Tacikistan – mənim sevimli vətənim” respublika müsabiqəsinin qalibi, Tacikistan Respublikası Prezidentinin İcra Aparatı yanında Dövlət Simfonik Orkestrinin estrada qrupunun solisti Tamanno Baxromova ilə söhbət edib.
Onun peşəkar fəaliyyətində mühüm yer tutan məqamlardan biri də Tacikistan Respublikasının Prezidentinin iştirak etdiyi dövlət konsertlərində çıxışları olub. Tamannonun sözlərinə görə, son illərdə o, üç dəfə belə konsert proqramlarında iştirak edib.
Gənc sənətçi xatırlayır ki, onun Azərbaycan musiqisinə marağı hələ uşaqlıqdan yaranıb və bunun səbəbi atasının azərbaycanlı olmasıdır.
“Uşaqlıqdan Azərbaycan dilində danışığı, musiqini, mahnıları eşidirdim və Azərbaycan mədəniyyətinə qismən də olsa, bələd olmağa imkan verən bir mühitdə böyümüşəm”, – deyə o qeyd edib.
Tamannonu xüsusilə Azərbaycan musiqisinin melodikliyi, ifanın emosional çaları və ənənəvi musiqi alətlərinin səslənməsi cəlb edib.
“Ənənəvi Azərbaycan musiqi alətlərinin, xüsusilə kamançanın səslənməsini həmişə dinləməyi xoşlamışam. Həm də bu ifa tərzində və xarakterində doğma nəsə hiss olunurdu. Yəqin ki, məni də məhz buna görə nəsə özünə cəlb etdi”, – deyə sənətçi bildirib.
Bu gün onun repertuarında hələlik Azərbaycan mahnıları o qədər də çox deyil. Tamannonun etiraf etdiyi kimi, bunun səbəbi həmin mahnıları daha məsuliyyətlə ifa etmək istəyidir. Müğənni əvvəlcə Azərbaycan dilini daha dərindən öyrənmək niyyətindədir ki, əsərlərin məzmununu daha yaxşı anlasın və onların ifadə etdiyi mənanı dinləyiciyə çatdıra bilsin.
“Mənim üçün dili öyrənmək vacibdir ki, Azərbaycan musiqisini, sözləri və müəllifin çatdırmaq istədiyi fikri mümkün qədər dərindən hiss edə bilim”, – deyə o vurğulayıb.
Tamannonun hələ musiqi məktəbində oxuduğu vaxt ifa etdiyi ilk Azərbaycan mahnısı məşhur xalq mahnısı “Sarı gəlin” olub. Onun sözlərinə görə, həmin vaxt şəxsi motivasiyası da var idi – mahnını atasının doğma dilində ifa etməklə onu sevindirmək.
“Mahnını atamın doğma dilində ifa etməklə onu təəccübləndirmək və sevindirmək istəyirdim və nəticədə buna nail oldum”, – deyə gənc sənətçi xatırlayıb.
Onun seçimi ilk dinləyicilərin də marağına səbəb olub. Həmin dövrdə Tacikistan səhnəsi üçün Azərbaycan dilində mahnı səsləndirmək, xüsusilə də bunu musiqi məktəbinin şagirdinin ifasında eşitmək qeyri-adi hal idi. Sonralar Tamanno peşəkar fəaliyyətində Azərbaycan musiqisinə daha çox müraciət etməyə başlayıb.
Bu istiqamətdə “Ayrılıq” mahnısı xüsusi yer tutub. Sənətçi əvvəlcə mahnının öz ifasında kaver versiyasını hazırlayaraq sosial şəbəkələrdə yerləşdirib. Daha sonra Azərbaycan üslubunda musiqi ifa edən və improvizələr edən tacik bəstəkar və musiqiçi Curabek Umarovla tanış olub. Beləliklə, konsert proqramına Azərbaycan musiqi əsərinin daxil edilməsi ideyası yaranıb.
2026-cı ilin mayında Tamanno Curabek Umarovla birlikdə ilk dəfə “Ayrılıq” mahnısını T.Sattorov adına Tacikistan Milli Konservatoriyasının Böyük zalında Samirə Amirşoyevanın “Эҳёи садо” (“Musiqinin dirçəlişi”) adlı solo konsertində ifa edib.
Sənətçinin sözlərinə görə, dinləyicilərin reaksiyası onun üçün xüsusilə əhəmiyyətli olub.
“Dinləyicilər konsertə Azərbaycan dilində mahnı daxil etməklə yenilik gətirilməsini çox bəyəndilər. Çoxlu sayda müsbət və heyranlıq ifadə edən rəylər oldu. Hətta tamaşaçılardan biri mahnını dinləyərkən gözlərinin dolduğunu dedi”, – deyə o bildirib.
Tamanno üçün bu reaksiya sübut edib ki, musiqi dili tam başa düşmədən də hissləri çatdıra bilir.
“Mən hesab edirəm ki, dili bilinməyən bir mahnının ifası ilə dinləyicilərin qəlbinə toxuna bilmişiksə, deməli, onlar həmin mahnını daha dərin səviyyədə hiss edib anlayıblar”, – deyə gənc sənətçi qeyd edib.
“Azərbaycan musiqisi mənim üçün məhz belədir. Sözlərinin mənasını başa düşüb-düşməməyin əhəmiyyəti yoxdur, belə ki, melodiyanın özü sözlərdən daha çox şey deyir, ifanın səmimiliyi və duyğusallığı isə onu dinləyən hər kəsin qəlbinin dərinliklərinə toxunur”, – deyə o əlavə edib.
Tamanno Azərbaycan cazına xüsusi sevgisinin olduğunu da bildirib. Onun ən çox dinlədiyi musiqiçilər arasında Vaqif Mustafazadə, Əzizə Mustafazadə, Şövkət Ələkbərova, Akif İslamzadə və Eyyub Yaqubovun adlarını çəkib.
“Ənənəvi və müasir musiqinin bir-biri ilə ahəng təşkil etdiyi, eyni zamanda, Azərbaycanın musiqi xarakterini və mədəniyyətini qoruyub saxladığı əsərləri xüsusilə bəyənirəm”, – deyə o bildirib.
Azərbaycan musiqisinə maraq tədricən sənətçinin peşəkar planlarının da bir hissəsinə çevrilir. “Ayrılıq” mahnısının tamaşaçılar tərəfindən müsbət qarşılanmasından sonra əsər növbəti konsertdə də səsləndirilib. Hazırda isə Tamanno və Curabek Umarov yeni əsər – “Küçələrə su səpmişəm” mahnısını hazırlayırlar.
“Ümid edirəm ki, yaxın vaxtlarda konsertlərimizdə Azərbaycan mahnıları daha tez-tez səslənəcək”, – deyə gənc sənətçi bildirib.
Azərbaycan və Tacikistan arasında mədəni əlaqələrdən danışan Tamanno iki ölkədə keçirilən mədəniyyət günlərinin və yaradıcı kollektivlərin qastrol səfərlərinin əlaqələrin daha da yaxınlaşması üçün imkanlar yaratdığını qeyd edib.
Onun sözlərinə görə, Tacikistan Respublikası Prezidentinin İcra Aparatı yanında Dövlət Simfonik Orkestrinin musiqiçiləri son illərdə Azərbaycanın bir sıra şəhərlərində, o cümlədən Bakıda çıxış ediblər. Konsert proqramlarında tacik, Azərbaycan və digər dillərdə əsərlər səsləndirilib.
“Mən hesab edirəm ki, mədəni mübadilə prosesi kifayət qədər uğurla gedir və düşünürəm ki, yaxın vaxtlarda bu əlaqələr daha da möhkəmlənə bilər”, – deyə Tamanno Baxromova sözlərini yekunlaşdırıb.
Müxbir – Lalə Minasazova
Bölmənin digər xəbərləri
