Orta Dəhlizin inkişafı nəqliyyat və logistika infrastrukturuna investisiyaları artırır - ŞƏRH
Bakı, 1 oktyabr, AZƏRTAC
Orta Dəhlizin genişləndirilməsinin marşrut üzərində yerləşən ölkələrin nəqliyyat və logistika infrastrukturunun yenilənməsinə, yeni investisiya layihələrinin həyata keçirilməsinə və regional iqtisadi əlaqələrin möhkəmlənməsinə mühüm töhfə verir.
Bunu AZƏRTAC-a açıqlamasında türk iqtisadçı ekspert Mehmet Seven bildirib.
Ekspertin sözlərinə görə, son illərdə Avropa ilə Asiya arasında alternativ və dayanıqlı nəqliyyat bağlantılarına marağın artması Orta Dəhlizin əhəmiyyətini daha da yüksəldib.
“Bu marşrutun səmərəli fəaliyyət göstərməsi üçün iştirakçı dövlətlər arasında koordinasiyanın gücləndirilməsi ilə yanaşı, mövcud nəqliyyat infrastrukturunun müasirləşdirilməsi vacibdir. Orta Dəhliz yalnız bir nəqliyyat marşrutu deyil, eyni zamanda, onun keçdiyi ölkələr üçün yeni iqtisadi imkanlar yaradan mühüm regional bağlantıdır. Marşrut üzrə yük dövriyyəsinin artması dəmir yollarının, avtomobil yollarının, limanların və logistika terminallarının inkişafını zəruri edir. Yükdaşımaların artması ilə əlaqədar logistika mərkəzlərinin, anbar komplekslərinin, yük terminallarının və digər nəqliyyat infrastrukturu obyektlərinin yaradılması üçün yeni imkanlar formalaşır. Orta Dəhlizin rəqabət qabiliyyətinin yüksəldilməsi üçün infrastruktur layihələri ilə yanaşı, rəqəmsallaşma və gömrük prosedurlarının sadələşdirilməsi istiqamətində də tədbirlərin davam etdirilməsi vacibdir. Yüklərin elektron izlənməsi, sənədləşmə proseslərinin rəqəmsallaşdırılması və sərhəd-keçid prosedurlarının sürətləndirilməsi daşımaların vaxt və maliyyə baxımından daha səmərəli həyata keçirilməsinə imkan verə bilər”, - deyə Mehmet Seven qeyd edib.
Onun fikrincə, Azərbaycanın Xəzər dənizi sahilində yerləşməsi, Bakı Beynəlxalq Dəniz Ticarət Limanı, dəmir yolu və avtomobil yolları şəbəkəsinin inkişaf etdirilməsi ölkənin beynəlxalq tranzit və logistika imkanlarını genişləndirir: “Azərbaycanın nəqliyyat-logistika infrastrukturu Orta Dəhlizin əsas halqalarından biridir. Xəzər üzərindən yükdaşımaların səmərəli təşkili, Bakı limanının imkanlarının genişləndirilməsi və dəmir yolu bağlantılarının inkişaf etdirilməsi marşrutun ümumi potensialının artırılmasına xidmət edir”.
Mehmet Seven əlavə edib ki, Orta Dəhlizin inkişafı Azərbaycan və Türkiyə arasında nəqliyyat-logistika əməkdaşlığının genişləndirilməsi üçün də yeni perspektivlər açır. Bakı-Tbilisi-Qars dəmir yolu xətti və digər regional nəqliyyat bağlantıları iki ölkənin Avropa ilə Asiya arasındakı ticarət əlaqələrində rolunu daha da gücləndirə bilər.
Ekspertin sözlərinə görə, marşrut boyunca infrastrukturun yenilənməsi yalnız yükdaşımaların həcminə deyil, həm də yeni xidmət sahələrinin formalaşmasına təsir göstərəcək. Logistika, anbar, sığorta, nəqliyyat xidmətləri və digər əlaqəli sektorların inkişafı əlavə iqtisadi dəyərin yaranmasına və yeni biznes imkanlarının formalaşmasına şərait yarada bilər. O vurğulayıb ki, Orta Dəhlizin uzunmüddətli perspektivdə səmərəli fəaliyyət göstərməsi üçün iştirakçı ölkələrin vahid yanaşma əsasında əməkdaşlığı davam etdirməsi, infrastruktur layihələrinin əlaqələndirilməsi və tranzit prosedurlarının mümkün qədər sadələşdirilməsi mühüm əhəmiyyət daşıyır.
Mehmet Seven hesab edir ki, Orta Dəhliz üzrə investisiyaların artırılması və nəqliyyat-logistika infrastrukturunun müasirləşdirilməsi marşrutun beynəlxalq ticarətdə rolunun daha da güclənməsinə səbəb ola bilər.
Bölmənin digər xəbərləri
