Aİ quruma üzv ölkələrdə qalmaq hüququ olmayan şəxslərin geri qaytarılması qaydalarını sərtləşdirib
Berlin, 1 oktyabr, AZƏRTAC
Avropa İttifaqı (Aİ) quruma üzv ölkələrdə qalmaq hüququ olmayan şəxslərin daha effektiv geri qaytarılmasına imkan verən yeni qaydaları təsdiqləyib.
AZƏRTAC xəbər verir ki, bu qaydalar üzv ölkələrə geri qaytarma prosedurlarını vahid çərçivədə həyata keçirməyə, həmçinin təhlükəsizlik riski yaradan şəxslərə qarşı daha sərt tədbirlər görməyə imkan verəcək.
Qaydalar çərçivəsində geri qaytarılma qərarı alan Aİ xaricindən olan şəxslər ölkəni tərk etməli və hakimiyyət orqanları ilə əməkdaşlıq etməlidirlər. Bu tələblərə əməl edilməməsi milli qanunvericilikdən asılı olaraq maliyyə cərimələri, müavinətlərin azaldılması və bəzi hallarda cinayət sanksiyaları ilə nəticələnə bilər.
Yeni sistem Avropa Geri Qaytarma Sərəncamının tətbiqini də nəzərdə tutur. Bu sənəd üzv ölkələrə digər Aİ dövlətlərinin verdiyi geri qaytarma qərarlarını tanımaq üçün məlumat mübadiləsini asanlaşdıracaq. Qərarların qarşılıqlı tanınması ilkin mərhələdə könüllü olacaq.
Təhlükəsizlik riski yaradan şəxslər üçün müddətsiz giriş qadağası və müəyyən hallarda 24 aydan uzun həbs imkanları da nəzərdə tutulur.
Qaydalar, həmçinin Aİ-dən kənarda geriqaytarma mərkəzlərinin yaradılmasına da imkan verir. Bunun üçün müvafiq ölkə ilə razılaşma tələb olunacaq və beynəlxalq insan hüquqları normalarına, o cümlədən geri göndərilmənin qadağan edilməsi prinsipinə əməl olunmalıdır. Müşayiətsiz azyaşlılar bu razılaşmalardan kənarda saxlanılır.
Qaydalar Aİ-nin Miqrasiya və Sığınacaq Paktının icrasını tamamlayır. Onlar rəsmi jurnalda dərc edildikdən sonra qüvvəyə minəcək, bəzi müddəalar dərhal, digərləri isə bir il sonra tətbiq olunacaq.
Bölmənin digər xəbərləri
