Bakı, 24 yanvar (AZƏRTAC). Yanvarın 24-də Yeni Azərbaycan Partiyası (YAP) idarə heyətinin növbəti iclası keçirilmişdir.

AZƏRTAC xəbər verir ki, iclasda YAP-ın 2012-ci ildə fəaliyyətinə dair hesabatı, maliyyə hesabatı, o cümlədən Qadınlar Şurası və Gənclər Birliyinin statistik hesabatları müzakirə olunaraq təsdiq edilmişdir.

İclasda qeyd olunmuşdur ki, hesabat ilində YAP ictimai - siyasi proseslərə təsir imkanları xeyli genişlənmiş, cəmiyyətdəki aparıcı mövqeyi daha da möhkəmlənmiş və beynəlxalq nüfuzu yüksəlmişdir. Hesabat ilində partiyanın beynəlxalq əlaqələrinin inkişafına xüsusi diqqət yetirilmişdir. Xüsusilə, Avratlantik məkanda Avropa Xalqları Partiyası (EPP) və Asiya qitəsində Asiya Siyasi Partiyalarının Beynəlxalq Konfransı (İCAPP) ilə münasibətlər ardıcıl olaraq yüksələn xətt üzrə inkişaf etmişdir. Bu baxımdan, İCAPP-ın 2012-ci ilin iyun ayında Beynəlxalq Konfransının Daimi Komitəsinin 17-ci və 18-ci iclaslarının, eləcə də bu qurumun VII Baş Assambleyası kimi mötəbər tədbirlərin Bakı şəhərində keçirilməsi YAP-ın beynəlxalq nüfuzunun göstəricisi kimi dəyərləndirilməlidir.

Partiyanın sıralarının genişlənməsində, üzvlərinin sayının artmasında arxada qoyduğumuz il də istisna olmamışdır. Ötən il YAP sıralarına 37854 nəfər yeni üzv qəbul olunmuşdur. Onlardan 20 min nəfərdən çoxu gənclərdir. Hazırda partiyanın 7573 ilk təşkilatında qeydiyyatda olan partiya üzvlərinin ümumi sayı 591355 nəfərə çatmışdır.

İdarə heyətinin iclasında, həmçinin partiyanın 2012-ci il maliyyə hesabatı təsdiq edilmişdir. Bildirilmişdir ki, ötən il partiya üzvlük haqlarından partiya büdcəsinə 5 milyon 389 min 557 manat daxil olmuşdur. Bu vəsaitin 2 milyon 969 min 702 manatı əmək haqlarının ödənilməsinə, 1 milyon 98 min 855 manatı müxtəlif xarakterli partiya tədbirlərinin, o cümlədən üç beynəlxalq tədbirin maliyyələşdirilməsinə, 198 min manatı ezamiyyə xərclərinə, 250 min manatı təsərrüfat inventarlarının, texniki avadanlığın və nəqliyyat vasitələrinin alınmasına, 145 min manatı nəqliyyat vasitələrinə texniki xidmət və yanacaq xərclərinə, 268 min manatı cari təmir işlərinə, 73 min manatı çap işlərinə, 387 min manatı kommunal, icarə haqqı, rabitə xərcləri, bank xidməti, dəftərxana və s. istiqamətlərə sərf edilmişdir.

İclasda, həmçinin YAP-ın V Qurultayına və bu ilin payızında keçiriləcək prezident seçkilərinə hazırlıq işləri müzakirə edilmişdir.