® “PAŞA Bank” İlkin Kütləvi Təklif çərçivəsində səhmlərinin abunə yazılışının müddətini uzadıb
“PAŞA Bank” “Paylaşdıqca böyüyürük. Birlikdə” şüarı altında elan etdiyi İlkin Kütləvi Təklif (IPO) çərçivəsində səhmlərinin abunə yazılışının müddətini iyunun 12-dək uzadıb.
Qərar investorlar, müştərilər və tərəfdaşlardan gələn müraciətlər nəzərə alınaraq, daha çox şəxsin “PAŞA Bank”ın səhmdarı olmaq imkanı əldə etməsi məqsədilə qəbul olunub.
“PAŞA Bank”ın İdarə Heyətinin üzvü, baş maliyyə inzibatçısı Murad Süleymanov bildirib ki, IPO çərçivəsində müşahidə olunan yüksək investor marağı abunə müddətinin uzadılması qərarında mühüm rol oynayıb.
“PAŞA Bank olaraq ilk gündən məqsədimiz yalnız uğurlu IPO həyata keçirmək deyil, eyni zamanda ölkəmizin kapital bazarlarının inkişafı naminə bu prosesdə daha geniş investor iştirakını təşviq etmək və mümkün qədər çox insanın IPO prosesinin bir parçasına çevrilməsinə imkan yaratmaq olmuşdur. Bu IPO təkcə “PAŞA Bank” üçün deyil, bütövlükdə Azərbaycanın kapital bazarları üçün əlamətdar bir mərhələdir. Ölkəmizdə ilk dəfə olaraq özəl təşkilatın bu miqyasda səhmlərinin geniş investor kütləsinə təqdim olunması bazara olan etimadın, investor mədəniyyətinin və uzunmüddətli investisiya yanaşmasının formalaşdığını göstərir. Aprelin 13-də start verdiyimiz abunə yazılışı müddəti ərzində hazırkı tarixə artıq təxminən 12 minə yaxın müraciət qəbul etmişik və investor marağının hər gün daha da artdığını müşahidə edirik. Son günlər tərəfdaşlıq etdiyimiz investisiya şirkətlərinə və Bankımıza abunə müddətinin uzadılması ilə bağlı müraciətlər daxil olur. Xüsusilə qeyd etmək istərdim ki, artıq abunə yazılışında iştirak etmiş investorlar üçün bütün mövcud üstünlüklər qüvvədə qalır. İnvestorlar həm 2025-ci, həm də 2026-cı illər üzrə dividend əldə etmək hüququnu saxlayırlar. Eyni zamanda, abunə müddətinin uzadıldığı dövrdə yerləşdirilmiş bütün vəsaitlər üzrə hesablanan illik 5 faiz gəlir (“overnight”) mexanizmi də davam etdiriləcək. İnanırıq ki, bu qərar daha çox investorun ölkənin aparıcı maliyyə institutlarından birinin səhmdarı olmaq imkanından yararlanmasına şərait yaradacaq. Eyni zamanda xüsusi vurğulamaq istəyirəm ki, bu uzadılma son fürsətdir. 12 iyun 2026-cı il tarixi IPO üzrə sifarişlərin qəbul ediləcəyi son gündür. Bir daha göstərilən böyük marağa və etimada görə bütün investorlarımıza təşəkkür edir və hər kəsi bu tarixi mərhələnin bir parçası olmağa dəvət edirik,” – deyə M.Süleymanov bildirib.
Qeyd edək ki, Emissiya Prospektinə əsasən, səhmlərin kütləvi təklifi üzrə abunə yazılışının müddəti maksimal 3 ay olmaqla müəyyən edilib. Abunə yazılışı müddəti ərzində investorlar və tərəfdaşlar tərəfindən abunə yazılışı müddətinin uzadılması ilə əlaqədar həm banka, həm də anderrayterlərə müraciət daxil olmuşdur. Daxil olmuş müraciətlər və eləcə də abunə yazılışının son dövrləri müşahidə olunan müsbət dinamika nəzərə alınaraq, bank tərəfindən abunə yazılışı müddətinin emissiya prospektində nəzərdə tutulan müddət daxil olmaqla 12 iyun 2026-cı il tarixinə kimi uzadılması qərara alınıb.
PAŞA Bank kapitalının 5 faizini təşkil edən cəmi 932,926 ədəd adi, adlı səhm investorlara təqdim olunur. Səhmin ilkin yerləşdirmə qiyməti 55 manat olaraq müəyyən edilib, minimal alış 1 səhmdir və maksimum limit tətbiq edilmir. Abunə dövründə əvvəlcədən ödənilmiş məbləğlərə illik 5 faiz faiz gəliri hesablanır. Səhmlərin yerləşdirilməsi Bakı Fond Birjası vasitəsilə həyata keçirilir.
İnvestorlar “PAŞA Bank”ın mobil tətbiqi, həmçinin “PAŞA Kapital”, “Birbank Invest”, “ABB Invest”, “Unicapital”, “Leobank” və “Yelo Bank” platformaları və mobil tətbiqləri vasitəsilə IPO-da iştirak edə bilərlər. Fiziki olaraq isə prosesdə “PAŞA Bank”, “Kapital Bank” və “Unibank” filiallarında, eləcə də “PAŞA Kapital” ofisi və digər lisenziyalaşdırılmış investisiya şirkətlərinə müraciət etməklə iştirak mümkündür.
Ətraflı məlumat əldə etmək üçün ipo.pashabank.az saytına keçid edin.
“PAŞA Bank” qeyri-neft sektorunun inkişafını, real sektorun maliyyələşdirilməsini və iqtisadiyyatın şaxələndirilməsini əsas prioritet kimi müəyyən edib. Bank Azərbaycandan əlavə, Gürcüstan və Türkiyədə də fəaliyyət göstərir.
Bölmənin digər xəbərləri
