® “Mygov” platforması 2 yaşında 4 milyon istifadəçiyə çatıb
Yenilənmiş “mygov” platformasının fəaliyyətə başlamasından iki il ötür. Bu müddətdə platformanın istifadəçi sayı əhəmiyyətli dərəcədə artaraq 4 milyona çatıb. Hazırda platforma vasitəsilə vətəndaşlara 430 dövlət xidməti və 102 məlumat vahid rəqəmsal mühitdə təqdim olunur. Qeydiyyatdan keçmiş istifadəçilərin 57 faizi platformadan aylıq aktiv istifadə edir, istifadəçi məmnuniyyəti isə 97,7 faiz təşkil edir.
İki il ərzində platformanın funksional imkanlarının genişləndirilməsi, yeni rəqəmsal xidmətlərin istifadəyə verilməsi, dövlət xidmətləri və məlumatlarının vahid platformada mərkəzləşdirilməsi nəticəsində “mygov” gündəlik istifadə olunan əsas rəqəmsal dövlət platformasına çevrilib və rəqəmsal dövlət ekosistemindəki rolunu genişləndirib.
“Mygov”un başlıca məqsədi dövlət xidmətlərini vahid rəqəmsal platformada birləşdirərək vətəndaşların xidmətlərə sadə, rahat və operativ çıxışını təmin etmək, müxtəlif qurumlara və xidmət kanallarına ayrıca müraciət ehtiyacını azaltmaqdır. Bu yanaşma dövlət xidmətlərinin rəqəmsal və proaktiv formada təqdim edilməsinə, fiziki müraciətlərin, sənəd dövriyyəsinin və kağız istifadəsinin əhəmiyyətli dərəcədə azaldılmasına imkan yaradır. Bununla yanaşı, “mygov” platformasında həyat hadisələri əsaslı rəqəmsallaşma yanaşması tətbiq edilir və vətəndaşların müxtəlif həyat mərhələləri üzrə ehtiyac duyduğu dövlət xidmətlərinin vahid rəqəmsal mühitdə, daha sadə və əlaqələndirilmiş formada təqdim olunması təmin edilir.
Platformanın inkişafının mühüm istiqamətlərindən biri dövlət xidmətlərinin ayrı-ayrı platformalarda pərakəndə şəkildə təqdim edilməsindən vahid rəqəmsal mühitə keçidin təmin olunmasıdır. Bu yanaşmanın əsası 2026-cı il fevralın 11-də Azərbaycan Respublikasının Prezidenti İlham Əliyevin sədrliyi ilə keçirilən “Azərbaycanın yeni rəqəmsal arxitekturası” üzrə vahid fəaliyyət planına həsr olunmuş müşavirədə qoyulub. Bu istiqamətdə aparılan işlərin davamı olaraq, “Azərbaycan Respublikasında rəqəmsal inkişafın sürətləndirilməsinə dair 2026-2028-ciillər üçün Fəaliyyət Planı” təsdiq edilib və rəqəmsal dövlət xidmətlərinin “bir pəncərə” prinsipi ilə “mygov” platforması vasitəsilə təqdim olunması müəyyənləşdirilib. Bu çərçivədə artıq “e-Sosial”, “e-Su” və “e-Təbib” kimi ayrı-ayrımobil tətbiqlərdə təqdim olunan xidmət və funksionallıqlar “mygov” platformasında birləşdirilib.
Hazırda “mygov” platformasında vətəndaşların şəxsiyyət vəsiqəsi, ailə tərkibi və ailə vəziyyəti, sosial müdafiə və məşğulluq, təhsil, hərbi xidmət, nəqliyyat və sağlamlıq üzrə məlumat və sənədlərinə vahid platformadan çıxış imkanı yaradılıb. Vətəndaşlar bu rəqəmsal sənəd və məlumatları QR kod vasitəsilə paylaşa və sənədi elektron formada yükləyə bilirlər. Bundan əlavə, qanunvericiliyə edilmiş dəyişikliklərə əsasən, 27 növ rəqəmsal sənəd fiziki sənədlərlə eyni hüquqi qüvvəyə malik olub. Son iki ildə “mygov”da 90-dan artıq dövlət xidməti yenidən tərtib edilərək rəqəmsallaşdırılıb. Platforma üzərindən əmək müqavilələrinin imzalanması, iş yerindən və məhkumluq haqqında arayışların əldə edilməsi, ilkin hərbi qeydiyyat, sürücülük vəsiqəsinin dəyişdirilməsi və nəqliyyatla bağlı digər xidmətlər, etibarnamələrin verilməsi, təhsil müəssisələrinə elektron qeydiyyat, işğaldan azad edilmiş ərazilərə səfər icazələrinin alınması, kommunal və digər ödənişlərin həyata keçirilməsi kimi rəqəmsal xidmətlər təqdim olunur.
“Mygov” platformasında, eyni zamanda, vətəndaşlara bir sıra funksionallıqlar da təqdim olunur. Belə ki, “mygov” üzərindən QR kod vasitəsilə dövlət və özəl qurumların platformalarına təhlükəsiz şəkildə daxil olmaq mümkündür. Bundan əlavə, “İcazələrin idarə edilməsi” funksiyası vətəndaşlara fərdi məlumat paylaşımına nəzarət imkanı verərək platformanı daha da istifadəçiyönümlü, təhlükəsiz və rahat edib. Eyni zamanda, dövlət qurumları ilə birbaşa rəqəmsal yazışma (məktubların göndərilməsi və alınması) imkanının yaradılması vətəndaş-dövlət kommunikasiyasını daha effektiv, çevik və əlçatan edərək rəqəmsal xidmət təcrübəsini əhəmiyyətli dərəcədə təkmilləşdirib.
Ümumilikdə, “mygov” üzərindən rəqəmsal məlumat və sənədlərdən istifadə sayı 8,1milyona çatıb. Ən çox istifadə olunan məlumatlar arasında şəxsiyyət vəsiqəsi məlumatları (4,11 milyon), iş yeri məlumatları (780 min), sürücülük vəsiqəsi məlumatları (283 min), ailə tərkibi (277 min), nikah haqqında şəhadətnamə məlumatları (228 min), eləcə də təhsil məlumatları, yaşayış yeri haqqında məlumatlar yer alıb.
Cari ilin avqust ayında qeydə alınan göstəricilərə əsasən, “mygov” vasitəsilə rəqəmsal xidmətlərə 2,21 milyon müraciət qeydə alınıb. Ən çox istifadə olunan xidmətlər sırasında əmək müqaviləsinin imzalanması - 766 min, iş yerinə dair arayışın əldə edilməsi - 337 min, məhkumluq haqqında arayışın alınması - 313 min, mobil cihazların qeydiyyatı - 126 min, məktəbəqədər təhsil müəssisələrinə elektron sənəd qəbulu -120 min müraciətlə öndədir. Bununla yanaşı, platformada sosial müdafiə və təminat, ilkin hərbi qeydiyyat, ailə üzvləri haqqında arayışın əldə edilməsi və işğaldan azad edilmiş ərazilərə səfər icazəsinin alınması kimi xidmətlərdən də aktiv istifadə edilir.
Hazırda platformanın inkişafı Fəaliyyət Planında müəyyən edilmiş istiqamətlərə uyğun olaraq davam etdirilir. Növbəti mərhələdə dövlət xidmətlərinin “mygov”da vahid rəqəmsal mühitdə birləşdirilməsi, platformada təqdim olunan rəqəmsal dövlət xidmətlərinin əhatə dairəsinin genişləndirilməsi və istifadəçi təcrübəsinin əhəmiyyətli dərəcədə təkmilləşdirilməsi istiqamətində işlər davam etdiriləcək. Xüsusi prioritet süni intellekt imkanlarının platformaya geniş inteqrasiyasına, fərdiləşdirilmiş və proaktiv xidmətlərin təqdim edilməsinə veriləcək.
Bölmənin digər xəbərləri
