DÜNYA
ABDULLAH GÜL DÜNYADA CÜC BALANSININ YENİDƏN FORMALAŞDIĞI QƏNAƏTİNDƏDİR
AZƏRTAC-ın xüsusi müxbiri xəbər verir ki, Türkiyə Prezidenti Abdullah Gül oktyabrın 1-də Türkiyə Böyük Millət Məclisinin payız sessiyasının açılışındakı nitqində son aylar baş verən dünyadakı iqtisadi böhran, Cənubi Qafqazdakı münaqişələr fonunda dünyadakı güc balansının yenidən formalaşdığını söyləmişdir.
Qlobal iqtisadi böhranın Türkiyə iqtisadiyyatına mənfi təsirini azaltmaq üçün səyləri artırmağın zəruriliyini qeyd edən Abdullah Gül, bank sektorunun 40 faizdən çoxunun xarici sərmayəyə məxsus olan maliyə sisteminin qorunması üçün əlavə tədbirlər görülməsini başlıca vəzifə kimi qeyd etmişdir.
Dövlət başçısı Türkiyənin də yerləşdiyi bölgənin bu dərin böhrandan zərər çəkəcəyini, bu təsirin minimuma endirilməsi üçün hökumətin milli iqtisadi proqram hazırlayacağını diqqətə çatdırmışdır. Bu məsələ parlamentin iclasından əvvəl Baş nazir Rəcəb Tayyib Ərdoğanın sədrliyi ilə Nazirlər Kabinetinin iclasında da müzakirə olunmuşdur.
Abdullah Gül Türkiyənin Cənubi Qafqaz və Yaxın Şərqdəki münaqişələrin həllində daha fəal rol oynayacağını da diqqətə çatdırmışdır.