ABŞ ALİMLƏRİ ELMƏ SİYASİ MÜDAXİLƏYƏ ETİRAZ EDİRLƏR

15.12.2006 [15:37]
Çap et
A⁺ A^-

AZƏRTAC Bi-Bi-Si-yə istinadla xəbər verir ki, təxminən 10 min ABŞ alimi, o cümlədən 52 Nobel mükafatı laureatı elmə siyasi müdaxiləyə qarşı etiraz bəyanatı imzalamışdır. Bəyanatda deyilir ki, tez-tez elmi məlumatlardan siyasi məqsədlər üçün istifadə olunur. Hökumət qurumları üçün işləyən mütəxəssislərdən dəfələrlə məlumatları bu və ya digər siyasi təşəbbüslərə uyğun olaraq dəyişmək xahiş edilmişdir. Bəyanatın müəllifləri bildirmişlər ki, bu müdaxilə Corc Buşun hakimiyyəti dövründə daha da artmışdır. Ağ ev Ətraf Mühiti Mühafizə Agentliyi, Ərzaq Məhsullarına və Dərmanlara Nəzarət İdarəsi kimi qurumların da işinə qarışır.

Sakit Okean İnkişaf, Ətraf Mühit və Təhlükəsizlik Tədqiqat İnstitutunun başçısı doktor Piter Qlayk demişdir: “Yaxşı elmsiz yaxşı ictimai siyasət yeritmək çox çətin olduğu kimi, yaxşı ictimai siyasəti pis elmlə yeritmək ondan da çətindir. Son illər elmdən qərəzli məqsədlə istifadə etmək halları artmışdır. Qlobal iqlim dəyişiklikləri, beynəlxalq təhlükəsizlik və ya su ehtiyatları kimi mühüm sahələrdə elmi işlərin keyfiyyətsiz aparılması qeydə alınmışdır”.

Narahat Alimlər İttifaqının nümayəndəsi Maykl Halpernin sözlərinə görə, siyasi müdaxiləyə qarşı etirazı müxtəlif siyasi baxışlara malik alimlər dəstəkləmişlər. Bəyanatı həm Respublikaçılar, həm də Demokratlar partiyalarından olan elmi müşavirlər də dəstəkləmişlər. İttifaq ümidvardır ki, ABŞ Konqresinin yanvarda işə başlayacaq yeni heyəti elmi tədqiqatların şəffaflığının qorunmasına daha diqqətlə yanaşacaqdır.

ABŞ ALİMLƏRİ ELMƏ SİYASİ MÜDAXİLƏYƏ ETİRAZ EDİRLƏR

MÜƏLLİFLƏ ƏLAQƏ

Bölmənin digər xəbərləri