ABŞ-da əhalinin yarıdan çoxu koronavirus əleyhinə tam vaksinasiyadan keçib
Bakı, 7 avqust, AZƏRTAC
ABŞ-da əhalinin 50 faizdən çoxu koronavirus əleyhinə tam vaksinasiyadan keçib.
AZƏRTAC Interfax informasiya agentliyinə istinadla xəbər verir ki, bu barədə Ağ evin pandemiya statistikası üzrə direktoru Sayrus Şahpar özünün tviter səhifəsində yazıb. O, həmçinin proses iştirakçılarını bu tempi saxlamağa çağırıb.
Sayrus Şahparın sözlərinə görə, bu həftə ərzində sutkalıq vaksinasiya hallarının sayı öncəki həftə ilə müqayisədə 11 faiz artıb. ABŞ-ın Xəstəliklərə Nəzarət və Onların Profilaktikası üzrə Mərkəzi son həftə ərzində orta hesabla gündə 699 min peyvənd vurulduğu barədə məlumat yayıb. Ümumilikdə isə ölkədə 165 milyondan çox insan koronavirus əleyhinə tam vaksinasiyadan keçib, 193 milyon insan isə azı bir doza peyvənd vurdurub.
Qeyd edək ki, ABŞ-da vaksinasiya kampaniyasında “BioNTech/Pfizer”, “Moderna” və “Janssen” peyvəndlərindən istifadə olunur.
Bölmənin digər xəbərləri
