ABŞ-ın Ekvadordakı səfirliyi konsulluq xidmətlərini dayandırıb
Bakı, 10 yanvar, AZƏRTAC
ABŞ-ın Ekvadorda, o cümlədən paytaxt Kitoda yerləşən diplomatik nümayəndəlikləri ölkədəki zorakılıq dalğası səbəbindən konsulluq xidmətlərini dayandırıb.
AZƏRTAC xəbər verir ki, bu barədə ABŞ səfirliyinin saytında dərc olunan məlumatda deyilir.
“Ekvadorda yaranan mövcud vəziyyətlə əlaqədar ABŞ-ın Kitodakı səfirliyində və Quayakildəki konsulluğunda viza və pasportların verilməsi, həmçinin digər xidmətlərin göstərilməsi dayandırılıb”, - deyə səfirlikdən bildiriblər.
Bir müddət öncə Çinin Ekvadordakı diplomatik nümayəndəlikləri də analoji addımlar atıb. ÇXR bu ölkədəki diplomatik missiyalarının fəaliyyətini müvəqqəti dayandırmaq qərarına gəlib.
Qeyd edək ki, Ekvador prezidenti Daniel Noboa ölkədə daxili silahlı münaqişənin mövcudluğunu tanıyan fərman imzalayıb, həmçinin yüksəkrütbəli məmurların və onların ailələrinin mühafizəsi haqqında göstəriş verib. Bu qərar yerli televiziya kanallarının birində canlı yayım zamanı əməkdaşların girov götürülməsindən sonra elan olunub. Girovları azad etməyə nail olan polis 13 cinayətkarı həbs edib.
Bölmənin digər xəbərləri
