ABŞ-IN ƏTRAF MÜHİTİN MÜHAFİZƏSİ AGENTLİYİ BP BARƏSİNDƏ CİNAYƏT TƏHQİQATI APARIR

11.04.2006 [17:18]
Çap et
A⁺ A^-

AZƏRTAC İTAR-TASS-a istinadla xəbər verir ki, ABŞ Ətraf Mühitin Mühafizəsi Agentliyi dünyanın ən iri neft şirkətlərindən biri olan bp barəsində cinayət təhqiqatı aparır. Hökumət bunu şirkətin ölkə ərazisindəki müəssisələrində və boru kəmərlərində baş vermiş bir sıra iri qəzalarla əlaqədar edir. Belə ki, bu qəzalar insan tələfatına gətirib çıxarmış və ətraf mühitə çox böyük ziyan vurmuşdur.

Axırıncı genişmiqyaslı qəza martın əvvəllərində Alyaskanın şimalındakı Nort-Sloup yatağında baş vermişdir. Neft kəmərinin zədələnməsi nəticəsində ətrafa 267 min qallonadək (1 qallon 3,785 litrdir) neft tökülmüşdür. Alyaskanın rəsmi nümayəndələrinin fikrincə, qəzaya boru kəmərinin korroziyası səbəb olmuşdur. Ştatın rəhbərliyi bildirmişdir ki, təmizləmə işləri aparılması üçün bp-dən 900 min dollardan 2 milyon dollaradək cərimə tutulmasına çalışacaqlar.

Keçən il şirkətin Texas ştatındakı neftayırma zavodunda baş vermiş partlayış nəticəsində 15 adam həlak olmuşdur. Əməyin Mühafizəsi İdarəsi müəssisədə təhlükəsizliyin təmin edilməsi tələblərinin pozulması faktları ilə əlaqədar şirkətə 21,3 milyon dollar məbləğində cərimə kəsmişdir. Əmək Nazirliyi bp-yə qarşı işi Ədliyyə Nazirliyinə vermişdir. Hazırda Ədliyyə Nazirliyi şirkətin rəhbərliyi barəsində cinayət təhqiqatı qaldırılması məsələsinə baxır.

ABŞ-IN ƏTRAF MÜHİTİN MÜHAFİZƏSİ AGENTLİYİ BP BARƏSİNDƏ CİNAYƏT TƏHQİQATI APARIR

MÜƏLLİFLƏ ƏLAQƏ

Bölmənin digər xəbərləri