ABŞ-IN MÜDAFİƏ NAZİRİ İSTEFA VERMİŞDİR

09.11.2006 [14:02]
Çap et
A⁺ A^-

AZƏRTAC-ın xüsusi müxbiri xəbər verir ki, ABŞ Konqresinə seçkilərdən sonra səslərin hesablanması hələ bitməsə də, qanunverici orqanda demokratların üstünlük əldə etdikləri bəlli olan kimi, noyabrın 8-də Buş Administrasiyasının əsas üzvlərindən biri, müdafiə naziri Donald Ramsfeld istefasını elan etmişdir. Prezident Corc Buş Pentaqonun başçısı vəzifəsinə Mərkəzi Kəşfiyyat Agentliyinin sabiq direktoru, ata Buşun silahdaşlarından biri olan 63 yaşlı Robert Geytsin namizədliyini irəli sürmüşdür.

Hələ ötən həftə Corc Buş jurnalistlərlə söhbətində Pentaqon başçısını özünün ikinci prezidentlik müddətinin sonuna qədər dəyişməyəcəyini bəyan etmişdi. Təhlilçilərin fikrincə, Donald Ramsfeldin istefası yeni Konqresin İraq müharibəsində Ağ Evdən tələb etdiyi siyasət dəyişikliyinin ilk işarəsidir. Demokratların düşərgəsi son aylar ərzində dəfələrlə Ramsfeldin istefasını tələb etmiş, müharibə strategiyasını müəyyənləşdirərkən onu generalların məsləhətini dinləməməkdə günahlandırmışdılar.

Donald Ramsfeld Prezident Corc Buşun hakimiyyəti ərzində iki dəfə istefa istəsə də, Ağ Evdən müsbət cavab almamışdır.

Xatırladaq ki, Donald Ramsfeld ikinci dəfədir müdafiə naziri vəzifəsində çalışır. O, Prezident Cerald Fordun hakimiyyəti dövründə də (1975-1977) Pentaqona başçılıq etmiş və bu vəzifədə fəaliyyət göstərən ən gənc şəxs olmuşdur.

ABŞ-IN MÜDAFİƏ NAZİRİ İSTEFA VERMİŞDİR

MÜƏLLİFLƏ ƏLAQƏ

Bölmənin digər xəbərləri