ABŞ-ın raket zərbələri nəticəsində azı 15 Suriya təyyarəsi məhv olub
Bakı, 7 aprel, AZƏRTAC
ABŞ-ın Aralıq dənizi akvatoriyasında dislokasiya olunmuş “Ross” və “Porter” esmineslərindən Suriyanın “Şayrat” hərbi bazasına endirilən raket zərbələri nəticəsində azı 15 döyüş təyyarəsi məhv edilib.
AZƏRTAC Inrerfax informasiya agentliyinə istinadla xəbər verir ki, bundan əlavə, aerodromdakı yanacaq sisternləri də yanıb. Yanğın indiyədək söndürülməyib. Bir qədər əvvəl zərbə nəticəsində 6 nəfərin, o cümlədən bir pilotun həlak olduğu barədə məlumat yayılıb. Həmçinin bir neçə təyyarəçinin yaralandığı bildirilir.
Xatırladaq ki, ABŞ Suriyada davam edən çoxillik müharibə ərzində ilk dəfə olaraq hərbi əməliyyat keçirib. Prezident Donald Tramp raket zərbəsinin aprelin 4-də Suriya hökumətinin İdlib şəhərində dinc sakinlərə qarşı tətbiq etdiyi kimyəvi hücuma cavab olaraq endirildiyini bildirib. Ağ ev rəsmilərinin məlumatlarında qeyd olunur ki, kimyəvi silah daşıyan təyyarələr məhz bu aerodromdan havaya qalxıb.
Bölmənin digər xəbərləri
