Bakıdakı Ümumdünya Şəhərsalma Forumu gənclər üçün mühüm təcrübə platforması oldu
Bakı, 21 may, AZƏRTAC
Müasir dövrdə şəhər həyat tərzinin üstünlük təşkil etdiyi dünya ölkələrində yeni şəhərlərin salınması və mövcud şəhərlərin genişlənməsi prosesləri sürətlə davam etməkdədir. Əhalinin böyük hissəsi artıq şəhərlərdə yaşayır ki, bu da onların idarə olunması, sosial bərabərlik, ekoloji təhlükəsizlik və dayanıqlı inkişaf məsələlərini ciddi şəkildə aktuallaşdırır. Bu il Bakıda keçirilən Ümumdünya Şəhərsalma Forumunun 13-cü Sessiyası (WUF13) şəhərlərin inkişafı ilə bağlı dünya ictimaiyyətini qayğılandıran məsələləri gündəmə gətirən ciddi beynəlxalq tədbir olmaqla yanaşı, bu tədbirə ev sahibliyi edən Azərbaycanın beynəlxalq nüfuzunun və qlobal şəhərsalma dialoqundakı rolunun daha bir göstəricisinə çevrildi.
Bu fikirləri AZƏRTAC-a müsahibəsində Bakı Dövlət Universitetinin (BDU) Humanitar məsələlər və gənclər siyasəti şöbəsinin müdiri Ramin Səmədov deyib. O bildirib ki, WUF13 çərçivəsində diqqətçəkən əsas məqamlardan biri gələcəyin şəhərlərini inşa edəcək, onları müasir dövrün tələblərinə uyğun inkişaf etdirəcək gənclərin fəal iştirakı oldu: “Gənclər başa düşdülər ki, şəhərlərin gələcəyi iqtisadi inkişaf, urbanizasiya, ekologiya və iqlim dəyişikliyi fonunda yeni yanaşmalar tələb edir. Bu isə ağıllı texnologiyalar, rəqəmsal idarəetmə, yaşıl enerjidən istifadə və ekoloji tarazlığın qorunması ilə mümkündür. Bəşəriyyəti düşündürən mühüm problemlərə həsr olunmuş bu mötəbər beynəlxalq tədbirdə iştirak edən gənclər sırasına ölkəmizin ən böyük ali təhsil müəssisəsi olan BDU-nun tələbələri də qoşuldular. BDU və Dövlət Şəhərsalma və Arxitektura Komitəsinin birgə təşkilatçılığı ilə “Davamlı və dayanıqlı şəhər inkişafı üçün insan kapitalının formalaşdırılması” mövzusunda keçirilmiş beynəlxalq konfrans universitet təmsilçilərinin daha dolğun və məzmunlu şəkildə məlumatlandırılmasına yardımçı oldu. Forumla əlaqədar BDU-da 50-dən çox seminar və təlimlər, panel müzakirələri və görüşlər təşkil olunmuş, müəllim və tələbələrlə müvafiq mövzuda mütəmadi olaraq söhbətlər aparılıb”.
Ramin Səmədov qeyd edib ki, tədbirlə bağlı ən yaddaqalan hadisələrdən biri də universitet könüllülərinin 66 ölkədən 217-dən çox təşkilatı bir araya gətirməklə 3,5 hektar ərazini əhatə edən “Urban Expo” sərgisində iştirakı oldu: “Hamı üçün mənzil: təhlükəsiz və dayanıqlı şəhərlər və yaşayış məntəqələri” mövzusuna həsr olunan sərgidə şəhərsalma və dayanıqlı inkişaf sahəsində qabaqcıl təcrübələr nümayiş etdirildi. Universitetin ekspozisiyasında isə şəhər mühitinin dayanıqlı inkişafı, iqlim dəyişikliklərinə uyğunlaşma, ekoloji tarazlığın qorunması və innovativ texnologiyaların tətbiqi ilə bağlı layihələr təqdim olundu. Burada, həmçinin inklüziv urban inkişaf modelləri və torpaq kadastrı sistemi üzrə elmi-tədqiqat təşəbbüsləri də nümayiş etdirildi. Təqdim edilən materiallarda müasir şəhərlərin qarşılaşdığı əsas çağırışlara elmi yanaşmalar, “ağıllı şəhər” konsepsiyaları, rəqəmsal transformasiya imkanları, həmçinin şəhər infrastrukturunun daha dayanıqlı və insan mərkəzli inkişafına yönəlmiş multidisiplinar tədqiqat nəticələri xüsusi yer tuturdu. BDU-nun müxtəlif fakültə və elmi mərkəzlərində aparılan tədqiqatların praktiki tətbiq imkanları, beynəlxalq layihələr və tərəfdaşlıq çərçivəsində həyata keçirilən birgə təşəbbüslər də ziyarətçilərin diqqətinə çatdırıldı. WUF13 Azərbaycanın gəncləri üçün mühüm təcrübə məkanı oldu. Forumda iştirak edən tələbələr, könüllülər və gənc tədqiqatçılar beynəlxalq mütəxəssislərlə ünsiyyət qurmaq, yeni biliklər əldə etmək və dünya təcrübəsini öyrənmək imkanı qazandılar. Xüsusilə könüllülərin fəaliyyəti tədbirin təşkilati uğurunda mühüm rol oynadı. Müxtəlif dillərdə ünsiyyət quran, xarici qonaqlara dəstək göstərən və tədbirin koordinasiyasında iştirak edən Azərbaycan gəncləri, o cümlədən forumda fəaliyyət göstərən 348 nəfər universitet könüllüsü ölkəmizin müasir və dinamik gəncliyini layiqincə nümayiş etdirdilər. Paytaxtımızın ev sahibliyi etdiyi WUF13 yalnız şəhərlərin gələcəyi və gələcəyin şəhərləri haqqında müasir dövrün tələbləri ilə səsləşən fikir və ideyaların, təşəbbüs və çağırışların geniş müzakirə olunduğu nüfuzlu beynəlxalq tədbir deyil, həm də bu gün elmi biliklərə yiyələnib sabah şəhərləri yaşadacaq gənclər üçün faydalı təcrübə platforması oldu. Azərbaycan gənclərinin bu tədbirdə fəal iştirakı ölkəmizin intellektual potensialının və dövlətimizin gənclər siyasətinin uğurlu nəticələrinin göstəricisidir. Bu həm də gənc nəslin gələcəyin dayanıqlı, təhlükəsiz və innovativ şəhərlərinin qurulmasına layiqli töhfələr verəcəyinə inam yaradır”.
Bölmənin digər xəbərləri
