Ekspert: Genişmiqyaslı iqlim dəyişikliyi əsasən insan təsiri ilə bağlıdır
Bakı, 21 may, AZƏRTAC
Azərbaycanın ən böyük çayı olan Kür ciddi çirklənmə ilə üz-üzədir. Hər il çimərliklərdə və çay kənarlarında təmizlik aksiyaları keçiririk. Bu ərazilər həssas ekosistemlərdir və çirklənmə burada yaşayan canlılara ciddi təsir göstərir. Biz bu fəaliyyətlərlə yalnız ətraf mühiti bərpa etmirik, həm də insanların təbiətin həyat üçün nə qədər vacib olduğunu dərk etməsinə çalışırıq. Paylaşılan rəqəmlər göstərir ki, bir ideya — əzm və doğru yanaşma ilə — Yer üzündə insanların həyatına əhəmiyyətli töhfə verə bilər.
AZƏRTAC xəbər verir ki, bu fikirləri Ümumdünya Şəhərsalma Forumunun 13-cü Sessiyası (WUF13) çərçivəsində keçirilən “İcma əsaslı və vətəndaş cəmiyyəti təşkilatlarının dəyirmi masası: İqlim böhranı şəraitində adekvat mənzil, torpaq və əsas xidmətlərin təmin olunması üçün aşağıdan yuxarıya icmayönümlü fəaliyyət” mövzusunda dəyirmi masada "IDEA Campaign" eksperti Elnur Səfərov bildirib.
"Təbiət qlobal miqyasda öz-özünü yaşadan bir modeldir. İnsan isə ətraf mühit üçün ən böyük təhdiddir. İnsan var olduqca onun həyatını qorumaq lazımdır, eyni zamanda, etiraf etməliyik ki, planetə ən böyük ziyanı da insan vurur. İqlim dəyişikliyi artıq nəzəri məsələ deyil. Başqa seçimimiz yoxdur — uyğunlaşmalı və insan həyatını qorumağa fokuslanmalıyıq. Xəzər regionu və Mərkəzi Asiya üzrə apardığım tədqiqatlar vəziyyətin nə qədər ciddi olduğunu göstərir. İnsan fəaliyyəti, xüsusən də yüksək enerji istehlakı, əsas səbəblərdən biridir. Bir çox ölkələr qəbul edir ki, genişmiqyaslı iqlim dəyişikliyi əsasən insan təsiri ilə bağlıdır. Bu əlaqə həm kritik, həm də danılmazdır", - deyə o qeyd edib.
Fotoqraf - Tofiq Babayev
Bölmənin digər xəbərləri
