ABŞ PREZİDENTİ TÜRKİYƏLİ HƏMKARINA BAŞSAĞLIĞI VERMİŞDİR
AZƏRTAC-ın xüsusi müxbiri xəbər verir ki, iyulun 11-də ABŞ Prezidenti Corc Buş türkiyəli həmkarı Abdullah Gülə telefonla zəng edərək, Birləşmiş Ştatların İstanbuldakı baş konsulluğuna hücum zamanı polislərin həlak olması ilə bağlı başsağlığı vermişdir.
Türkiyə Prezidentinin mətbuat mərkəzinin açıqlamasında bildirilir ki, Corc Buş rəsmi Ankaranın amerikalı diplomatları qorumaq üçün göstərdiyi səylərə görə təşəkkürünü bildirmiş, həlak olmuş polislərin ailələrinə başsağlığı vermişdir. ABŞ Prezidenti onların ailələrinə onun şəxsi başsağlığı diləklərini çatdırmağı Abdullah Güldən xahiş etmişdir.
Abdullah Gül amerikalı həmkarına təşəkkür etmiş, başsağlığı diləklərini həlak olanların ailələrinə çatdıracağını söyləmişdir. O, ölkəsinin terrorizmə qarşı mübarizə əzmini bir daha vurğulamış, bu mübarizədə ABŞ və Türkiyə arasında əməkdaşlığın əhəmiyyətini qeyd etmişdir.
Bölmənin digər xəbərləri
