ABŞ SƏFİRİ ROSS UİLSON İFTAR SÜFRƏSİ AÇMIŞDIR
ABŞ-ın Azərbaycandakı səfiri Ross Uilson Qafqaz Müsəlmanları İdarəsi Elmi-Dini Şurasının üzvləri, tanınmış şərqşünas alimlər üçün öz iqamətgahında iftar süfrəsi açmışdır. Səfir iftardan əvvəl çıxış edərək bildirdi ki, son illər islam dini Amerikada geniş yayılmışdır. Onun fikrincə, dini baxışlardakı fərq ixtilaflara və yadlaşmaya səbəb olmamalı, əksinə, müxtəlif mədəniyyətlərin qarşılıqlı surətdə zənginləşməsi prosesini gücləndirməlidir.
Cənab Uilson faciəli 11 sentyabr hadisələrində və bundan sonra islamı terrorizmlə eyniləşdirmək üçün göstərilən cəhdlərdən danışaraq vurğuladı ki, ABŞ prezidenti bütün bu uydurmaları qətiyyətlə rədd etmişdir. Çünki hər hansı cinayətkar kimi, terrorçunun da milliyyəti və dini mənsubiyyəti yoxdur. Odur ki, bütün bunlar şər qüvvələrin uydurmasıdır.
Səfir dəvətini qəbul etdiklərinə görə qonaqlara təşəkkürünü bildirdi və ölkəmizin bütün möminlərinə əmin-amanlıq və xoşbəxtlik, Azərbaycan torpağına isə tərəqqi arzuladı.
Qafqaz Müsəlmanları İdarəsinin sədri şeyxülislam hacı Allahşükür Paşazadə cavab sözündə Azərbaycanda tarixi ənənələrə malik dini dözümlülüyün hökm sürdüyünü xatırlatdı, dinə hörmətcil münasibətlərinə görə ABŞ prezidentinə və səfir Ross Uilsona təşəkkür etdi.
Bölmənin digər xəbərləri
