AERONAVİQATORLAR KİYEVDƏ GÖRÜŞ KEÇİRƏCƏKLƏR
Azərbaycanın aeronaviqasiya xidmətlərinin nümayəndələri Gürcüstan, Ukrayna və Moldovadan, habelə Qazaxıstandan olan həmkarları ilə sentyabrın 9-da Kiyevdə keçiriləcək görüşdə əməkdaşlığın və sıx qarşılıqlı fəaliyyətin öncül istiqamətləri ilə bağlı məsələləri müzakirə edəcəklər. Bu görüş Beynəlxalq Mülki Aviasiya Təşkilatının (İKAO), mülki aviasiya üzrə Avronəzarət və Avropa konfransının himayəsi ilə cari ilin iyununda Bakıda təşkil olunmuş konfransda həmin ölkələr arasında imzalanmış saziş çərçivəsində keçiriləcəkdir.
Azərbaycan Dövlət Hava Yolları Konserninin “Azəraeronaviqasiya” müəssisəsində AZƏRTAC-ın müxbirinə bildirmişlər ki, bu sənəd Avropa-Qafqaz-Asiya nəqliyyat dəhlizinin daha da inkişaf etdirilib möhkəmləndirilməsi məqsədi ilə imzalanmışdır. Sazişdə rabitə, naviqasiya, aviadaşımalara nəzarət sahəsində qarşılıqlı əməkdaşlığın əsas istiqamətləri və mexanizmləri müəyyənləşdirilmişdir.
Görüş iştirakçıları həmçinin əməkdaşlığı daha da möhkəmlətmək məsələlərini müzakirə etmək, habelə Qara dəniz və Xəzər dənizi hövzələri regionunda aeronaviqasiya xidmətlərinin inkişafına dair konsepsiya işləyib hazırlamaq niyyətindədirlər.
Bölmənin digər xəbərləri
