Afrika-Azərbaycan biznes-forumunun təşkili ilə bağlı fikir mübadiləsi aparılıb
Bakı, 12 may, AZƏRTAC
İxracın və İnvestisiyaların Təşviqi Agentliyi (AZPROMO) ilə Afrika Biznes Şurasının nümayəndə heyəti arasında görüş keçirilib.
AZPROMO-dan AZƏRTAC-a bildirilib ki, görüş zamanı qurumun icraçı direktoru Yusif Abdullayev agentliyin fəaliyyət istiqamətləri, eləcə də Azərbaycan ilə Afrika ölkələri arasında iqtisadi əlaqələrin mövcud vəziyyəti barədə məlumat verib.
Afrika Biznes Şurasının prezidenti xanım Amani Asfour təmsil etdiyi qurumun fəaliyyəti haqqında danışıb, Azərbaycan və Afrika işgüzar dairələri arasında əməkdaşlığın gücləndirilməsinin əhəmiyyətini vurğulayıb.
Görüşdə kənd təsərrüfatı, mədənçilik, tikinti və digər sahələrdə potensial əməkdaşlıq imkanları, qarşılıqlı investisiyaların təşviqi və biznes missiyalarının təşkili perspektivləri müzakirə edilib.
Eyni zamanda, Afrika Biznes Şurasının dəstəyi ilə Afrika-Azərbaycan biznes-forumunun təşkil edilməsi məsələsi ətrafında fikir mübadiləsi aparılıb. Bununla yanaşı, AZPROMO cari ilin iyun ayında Misirdə keçiriləcək Afrika İttifaqı İcraiyyə Şurasının 49-cu iclasına və oktyabr ayında Cənubi Afrika Respublikasında təşkil olunacaq Afrika Mədən Konfransında iştiraka dəvət olunub.
Bölmənin digər xəbərləri
