DÜNYA
AĞ EVİN NÜMAYƏNDƏLƏRİ RUSİYA VƏ ABŞ PREZİDENTLƏRİNİN QARŞIDAKI GÖRÜŞÜ HAQQINDA
Azərbaycan münaqişəsinin həlli və Xəzərin enerji layihələri Rusiya və ABŞ prezidentlərinin qarşıdakı görüşünün gündəliyində olacaqdır. Vaşinqtonun xarici mətbuat mərkəzində ABŞ prezidenti Corc Buşun Avropa səfərinə dair məlumat verən Ağ evin nümayəndələri Rusiya-Amerika danışıqlarında Cənubi Qafqazda təhlükəsizlik və sabitliklə bağlı məsələnin müzakirə olunacağına hələlik tam zəmanət verməsələr də, bunu istisna etmirlər. Onlar bildirmişlər ki, “Minsk qrupunun həmsədrləri olan ABŞ, Rusiya və Fransa fəaldırlar və münaqişənin həlli yolunun tapılmasında səylərini davam etdirirlər. Əslində, Buş hökumətinin 2001-ci ilin yazında ilk təşəbbüslərindən biri olan bu məsələdə biz Ki-Vestdə yaxşı irəliləyiş əldə etdik və daha da irəli gedəcəyimizə ümid bəsləyirik”.
Hökumət nümayəndələri Bakı-Tbilisi-Ceyhan əsas ixrac boru kəməri layihəsində Rusiyanın iştirakını görmək arzusunu bildirmişlər. Xəzərin enerji ehtiyatlarının çoxistiqamətli kəmərlərlə dünya bazarlarına çatdırılmasına ABŞ-ın bir daha dəstəyini vurğulayan Ağ evin nümayəndələri bu ehtiyatların bütün kəmərlərə kifayət edəcəyini söyləyərək demişlər: Bu məsələnin danışıqlara hansı şəkildə çıxacağını dəqiq deyə bilməsək də, ABŞ və Rusiya arasında bu sahədə əlaqəni əməkdaşlıq formasında görmək istərdik”.
Xatırladaq ki, Prezident Corc Buşun Avropa ölkələrinə mayın 22-də başlayacaq səfəri bir həftə davam edəcəkdir.
Şəfəq Akifqızı
AZƏRTAC-ın xüsusi müxbiri
ABŞ