AĞDAŞDA İSTEHSAL EDİLƏN MEYVƏ-TƏRƏVƏZ MƏHSULLARININ 60 FAİZİNDƏN ÇOXU MDB ÖLKƏLƏRİNƏ GÖNDƏRİLİR
Ağdaş rayonunda kənd təsərrüfatı məhsulları istehsalında tərəvəzçiliyin və meyvəçiliyin xüsusi çəkisi nəzərə çarpacaq dərəcədədir. Bu rayonun təbii iqlim şəraiti faraş və istixana tərəvəzçiliyinin inkişafı üçün çox əlverişli olduğundan burada ildə 2 dəfə məhsul yetişdirmək mümkündür.
Ağdaş Rayon İcra Hakimiyyətinin aqrar şöbəsindən AZƏRTAC-a bildirmişlər ki, kəndlərdə tərəvəzçilik əhalinin əsas gəlir mənbəyidir. Fermerlər və fərdi təsərrüfat sahibləri bu il 3681 hektar sahədə tərəvəz yetişdirmişlər. İndiyənədək 50 min 802 ton məhsul toplanmışdır. Bundan əlavə, hazırda rayonda 1232 hektar sahədə meyvə bağı vardır. Bu il daha 250 hektarda bağ salınmışdır. Cari ildə bar verən sahələrdən 1670 ton meyvə yığılmışdır. Meyvə-tərəvəz yığımı davam etdirilir.
Rayonda istehsal olunan meyvə-tərəvəz məhsullarına MDB ölkələrində yüksək tələbat vardır. Bu il rayonda istehsal olunan meyvə-tərəvəzin 60 faizindən çoxu Rusiya, Ukrayna, Belarus və Gürcüstana ixrac edilmişdir. Bu məhsulların arasında pomidor, xiyar, xurma, nar və alça üstünlük təşkil edir.
Bölmənin digər xəbərləri
