Ağstafada “Qərbi Azərbaycan-qədim yurd” mövzusunda tədbir keçirilib
Bakı, 25 iyun, AZƏRTAC
“Dialoq və İnkişaf Naminə” İctimai Birliyi Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə Ağstafa Rayon İcra Hakimiyyəti başçısı aparatının inzibati binasında “Qərbi Azərbaycan-qədim yurd” layihəsi çərçivəsində ilk tədbirini keçirib.
AZƏRTAC xəbər verir ki, tədbirdə əvvəlcə Dövlət Himni səsləndirilib, Ulu Öndər Heydər Əliyevin və Vətən uğrunda həyatlarını fəda edən şəhidlərimizin əziz xatirəsi bir dəqiqəlik sükutla yad edilib.
Tədbirdə çıxış edən Ağstafa Rayon İcra Hakimiyyəti başçısı Seymur Orucov bildirib ki, Prezident, Müzəffər Ali Baş Komandan İlham Əliyev xalqımızın mədəni-tarixi irsi olan Qərbi Azərbaycan torpaqlarına - əzəli və əbədi dədə-baba yurduna qayıtmaq niyyətində qətiyyətlidir. Bu qayıdış haqq davamızın yeni səhifəsidir və bu səhifə müasir Azərbaycanın memarı Ulu Öndər Heydər Əliyevin layiqli davamçısı Prezident İlham Əliyevin əzmi və qətiyyəti ilə yazılacaqdır.
“Dialoq və İnkişaf Naminə” İctimai Birliyinin sədri Çingiz Bayramov erməni millətçilərinin əsrlər boyu xalqımıza qarşı həyata keçirdikləri soyqırımı və deportasiya siyasətinin acı nəticələri barədə danışıb. Qeyd edilib ki, məqsədyönlü şəkildə həyata keçirilən etnik təmizləmə və deportasiya siyasəti nəticəsində xalqımız ağır məşəqqətlərlə üzləşib, soydaşlarımızın insan hüquqları kütləvi şəkildə pozulub. Bu mənfur siyasətin məqsədi azərbaycanlıları öz tarixi torpaqlarından qovmaq olub.
İctimai Birliyin İdarə Heyətinin üzvü, layihənin eksperti Anar Əsədov çıxış edərək Azərbaycan xalqının tarixi yaddaşında və milli şüurunda əzəli yurd yerimiz olan Qərbi Azərbaycan torpaqlarının xatirəsinin hər zaman yaşadığını diqqətə çatdırıb. Vurğulayıb ki, tarixi-mədəni irsimiz olan Qərbi Azərbaycan torpaqları əzəli və əbədi dədə-baba yurdudur. Məhz ermənilərin Cənubi Qafqaza köçündən sonra kütləvi deportasiyalar, soyqırımları, şimaldan gələn təzyiqlər soydaşlarımızı bu yerlərdən didərgin salıb.
Sonra Qazax-Tovuz Regional Gənclər və İdman İdarəsinin müdiri Əziz Məsmalıyev və Dağ Kəsəmən kənd 2 nömrəli tam orta məktəbin direktoru Vüsal Həsənov çıxış ediblər. Qeyd olunub ki, Zəngəzur dəhlizi iqtisadi, konseptual və beynəlxalq əhəmiyyətə malikdir. Qərbi Azərbaycana qayıdış isə milli kimliyimizin, tarixi yaddaşımızın qorunması və ədalətin bərpası baxımından xüsusi önəm daşıyır.
Bölmənin digər xəbərləri
