Ağsu dolaylarında qar və buzlaşma: hərəkət çətinləşib VİDEO
Ağsu, 21 yanvar, Rəşad Türkoğlu, AZƏRTAC
Bir neçə saatlıq fasilədən sonra Ağsu rayonunda yenidən qar yağmağa başlayıb. Yağan qar və şaxtalı hava şəraiti səbəbindən Bakı–Şamaxı–Yevlax avtomobil yolunun Ağsu dolaylarından keçən hissələrində, xüsusilə gecə saatlarında yolun hərəkət hissəsində buzlaşma yaranıb.
16 saylı Yol İstismar İdarəsinin baş mexaniki Ayaz Musalı AZƏRTAC-ın bölgə müxbirinə bildirib ki, əlverişsiz hava şəraiti ilə əlaqədar yolun qardan və buzdan operativ təmizlənməsi məqsədilə Azərbaycan Avtomobil Yolları Dövlət Agentliyinin 16 saylı Yol İstismar İdarəsinin və Avtomobil Yollarının Mühafizəsi Xidmətinin canlı qüvvəsi və xüsusi texnikası əraziyə cəlb olunub.
Onun sözlərinə görə, yolun hərəkət hissəsində, xüsusilə enişli-yoxuşlu və sərt döngəli sahələrdə nəqliyyat vasitələrinin təhlükəsiz hərəkətini təmin etmək üçün qum-duz qarışığı səpilməklə profilaktik tədbirlər görülür. Güclü külək və yağıntı səbəbindən yolun bəzi hissələrində yenidən buzlaşma yarandığından təmizləmə işləri fasiləsiz davam etdirilir.
Gecə saatları olmasına baxmayaraq, ərazidə işlər dayandırılmayıb. Yol İstismar İdarəsinin əməkdaşları tərəfindən 24 saatlıq növbəli iş rejimində yolun təmizlənməsi və təhlükəsizliyin təmin edilməsi istiqamətində tədbirlər görülür.
Eyni zamanda, Ağsu Rayon Polis Şöbəsinin və Yol Patrul Xidmətinin əməkdaşları qarlı hava şəraiti ilə əlaqədar Ağsu dolaylarında nəzarət tədbirlərini gücləndiriblər. Polis əməkdaşları dolaylara daxil olan nəqliyyat vasitələrini saxlayaraq sürücülərlə maarifləndirici söhbətlər aparır, avtomobillərin qarlı və buzlu yollarda hərəkət üçün texniki cəhətdən yararlılığını yoxlayır və mövcud yol şəraiti barədə sürücülərə ətraflı məlumat verirlər.
Hazırda bölgədə qar yağması davam edir. Sinoptiklərin məlumatına görə, səhər saatlarında havanın temperaturunun aşağı düşməsi səbəbindən buzlaşma ehtimalı yüksəkdir. Bu səbəbdən sürücülərə mümkün qədər Ağsu dolayları istiqamətində hərəkət etməmək, zərurət yarandıqda isə sürət həddinə əməl etmək, ara məsafəsini qorumaq və qış təkərlərindən istifadə etmək tövsiyə olunur.
Bölmənin digər xəbərləri
