Akademik: Türk dövlətlərinin rəqəmsal resurslarının vahid platformada inteqrasiyası zərurətə çevrilib
Bakı, 14 iyul, AZƏRTAC
Müasir dövrdə xalqlar və dövlətlər yalnız real məkanda deyil, virtual mühitdə də rəqabət aparır. Bəzi hallarda bu rəqabət informasiya müharibəsi səviyyəsinə yüksəlir və tarixi ziddiyyətlər rəqəmsal məkanda öz əksini tapır. Bu şəraitdə vahid virtual Türk dünyasının formalaşdırılması strateji əhəmiyyət daşıyır.
Bu fikirləri AZƏRTAC-a açıqlamasında AMEA-nın vitse-prezidenti, Elm və Təhsil Nazirliyinin İnformasiya Texnologiyaları İnstitutunun baş direktoru akademik Rasim Əliquliyev deyib.
Akademik bildirib ki, ayrı-ayrı türk dövlətlərinin mövcud rəqəmsal resurslarının vahid platformada inteqrasiyası, virtual Türk dünyasının arxitekturasının yaradılması və kibersuverenliyinin təmin olunması artıq zərurətə çevrilib.
“Bu məqsədlərə nail olmaq üçün humanitar sahə alimləri ilə yanaşı, informasiya texnologiyaları üzrə mütəxəssislərin də prosesdə fəal iştirakı vacibdir. Yalnız elmi və texnoloji potensialın birgə səfərbər edilməsi ilə vahid, təhlükəsiz və dayanıqlı virtual Türk dünyasının formalaşdırılması mümkün olacaq”, - deyə R.Əliquliyev bildirib.
Bölmənin digər xəbərləri
