AKROBATLARIMIZ DÜNYA ÇEMPİONATINA HAZIRLAŞIRLAR

18.03.2006 [22:04]
Çap et
A⁺ A^-

Bakıda Novruz bayramı münasibətilə akrobatik gimnastika üzrə ölkə birinciliyi başa çatmışdır. Gimnastika Federasiyasının mətbuat xidmətindən AZƏRTAC-ın müxbirinə bildirmişlər ki, çempionatda “Neftçi”, Bakı gimnastika məktəbi, Nizami rayonundakı idman məktəbi və “Təhsil” cəmiyyətindən 30 idmançı iştirak etmişdir. Qaliblərin hamısı çoxnövçülüyün nəticələrinə - müvazinət, sürət təmrinlərinə və qarışıq təmrinlərə əsasən müəyyənləşmişdir. Kişilərdən ibarət qrupda idman ustaları arasında 87,45 balla Rüstəm Nəcəfquliyev, İlham Abbasov, Vüqar Əhmədov və Fərid Məmmədov (Nizami rayonunun idman məktəbi) qalib gəlmişlər. Kişi cütləri arasında birinci yerə İsgəndər Alıyev və Sahverdi Zeynalov (74,05 bal, “Neftçi”) çıxmışlar.

Qadın cütləri arasında 75,6 balla “Neftçi” idmançıları Səminə İbrahimova və Viktoriya Maksimova fərqlənmişlər.

Ustalığa namizədlər arasında ən güclü kişi cütlüyü Rəşid Mustafin və Mixail Malkin (79,1 bal, gimnastika məktəbi) olmuşlar. Ən yaxşı qadın üçlüyü Könül Fərəcova, İnarə Haşimi və Dilara Sultanova (80,5 bal, Nizami rayonunun idman məktəbi) sayılmışdır.

Birinci dərəcəli idmançılar arasında qələbəni Afaq Məhərrəmova və Pərizad Quliyevadan ibarət qadın cütlüyü (80,9 bal, gimnastika məktəbi) və Faiq Sultanov və Tamara Babakişiyevadan ibarət (60,35 bal, eyni məktəb) qarışıq cütlük bayram etmişlər.

Aprelin ortalarında akrobatlarımız Portuqaliyada keçiriləcək dünya çempionatına hazırlaşmaq üçün Moskva vilayətinin Odintsovo şəhərində təlim-məşq toplanışlarına gedəcəklər.

AKROBATLARIMIZ DÜNYA ÇEMPİONATINA HAZIRLAŞIRLAR

MÜƏLLİFLƏ ƏLAQƏ

Bölmənin digər xəbərləri