AKVARELİN MÖCÜZƏLİ SEHRKARI
Fevralın 15-də “Speys” müstəqil teleradio şirkətində rəssam, şair, filosof, səyyah Çingiz Əzizin fərdi sərgisi açılmışdır.
Şirkətdən AZƏRTAC-ın müxbirinə demişlər ki, mərasimdə çıxış edənlər Çingiz Əzizin keçmiş SSRİ-də və xaricdə böyük sərgilərin iştirakçısı olmasından, onun əsərlərinin Tretyakov muzeyində, 20 ölkədə şəxsi kolleksiyalarda, müxtəlif fondlarda saxlandığından, rəssamın Moskvada və digər şəhərlərdə beş fərdi sərgisinin keçirilməsindən danışmışlar. Qeyd olunmuşdur ki, akvarelin möcüzəli sehrkarı olan Çingiz Əzizin psixoloji portretlərində, ekspressiv mənzərə tablolarında gözəllik, xeyirxahlıq, insan ruhunun ilahi ilkinliyi öz təsdiqedici, qurucu və yenilməz gücü ilə qələbə çalır.
Sonra rəssamın akvarel, rəngkarlıq və keramika işlərindən ibarət əsərlərinə baxış olmuşdur.
Sərginin açılışında müğənni Eyyub Yaqubov öz nəğmələrini ifa etmişdir.
Bölmənin digər xəbərləri
