ALİMLƏR İNSANIN DANIŞMASINA İMKAN VERƏN GENİ AŞKARA ÇIXARMIŞLAR
Londondakı məlumatlı mənbələr bildirmişlər ki, Böyük Britaniya və Almaniya alimləri insana danışmaq qabiliyyəti bəxş etmiş geni aşkara çıxarmışlar. Onların sözlərinə görə, kəşf barədə məlumat bəzi meymunların dezoksiribonuklein turşusunun (DNT) öyrənilməsi başa çatdıqdan sonra verilmişdir. Bu tədqiqatlar insanın heyvanlar aləmindəki “ən yaxın qohumlarından” nə ilə fərqləndiyini daha dəqiq müəyyənləşdirməyə imkan verəcəkdir.
Mütəxəssislər bildirirlər ki, FOXP2 geninin dəyişməsi insan təkamülünün hərəkətverici qüvvəsinə çevrilmiş, dilin və mədəniyyətin inkişafına kömək etmişdir.
İTAR-TASS xəbər verir ki, şimpanzelərin, qorillaların, oranqutanların, makakaların, habelə siçanların DNT-sinin öyrənilməsi nəticəsində alimlər FOXP2 genində kiçik, lakin mühüm tarixi dəyişikliklər aşkar etmişlər. Oksford Universitetinin əməkdaşı Saymon Fişer bildirmişdir ki, “genin dəyişilmiş kodu insanların üstünlüyünü təmin etmişdir: onlar fikirlərini daha aydın ifadə etməyə başlamışlar”.
Tədqiqatçılar bütün incəlikləri, o cümlədən insanın üz əzələlərinin hərəkətinə nəzarət etmək qabiliyyətini nəzərə alaraq, nitq üçün bütövlükdə yüzlərlə genin cavabdeh olduğunu istisna etmirlər.
Bölmənin digər xəbərləri
