ALMANİYA DƏMİR YOLLARI SƏRNİŞİN DAŞINMASI QİYMƏTLƏRİNİ BAHALAŞDIRMIŞDIR

23.09.2004 [12:07]
Çap et
A⁺ A^-

AZƏRTAC-ın xüsusi müxbiri xəbər verir ki, Almaniya Federal Dəmir Yolları Şirkəti uzaq məsafələrə sərnişin daşımalarının qiymətini orta hesabla 3,1 faiz bahalaşdırmaq qərarına gəlmişdir. Şirkət dəmir yolu ilə sərnişin daşımalarında bahalanmanın səbəbini enerjinin, xüsusilə yanacağın qiymətinin rekord səviyyəyə qalxması ilə əsaslandırmışdır. Almaniyada 2003-cü ilin əvvəlindən indiyədək enerji daşıyıcılarının qiyməti 30 faiz bahalanmış və bahalanma indi də davam etməkdədir. Bu isə şirkətin büdcəsinin mədaxil və məxaricinə xeyli ziyan gətirməkdədir.

Beləliklə, Federal Dəmir Yolları Şirkətinin qərarına görə, 2004-cü il dekabrın 12-dən başlayaraq dəmir yolu ilə uzaq məsafələrə - 150 kilometrdən 400 kilometrə qədər hərəkət edən ekspress qatarlarda birinci və ikinci dərəcəli vaqonlarda səyahət edəcək sərnişinlərin biletlərinin tarif qiyməti 3,4 faiz, 400 kilometrdən 700 və artıq kilometrə qədər məsafələrdə isə 4,2 faiz bahalanacaqdır.

Adi vaqonlarda yalnız oturmaqla uzaq məsafələrə səyahət edən sərnişinlərin biletlərinə standart 111 avro tarif qiyməti müəyyənləşdirilmişdir.