Almaniyada qatar maşinistlərinin üçgünlük tətili başlayıb
Bakı, 10 yanvar, AZƏRTAC
Almaniyada qatar maşinistlərinin həmkarlar ittifaqı əsas dövlət dəmiryolu operatoru “Deutsche Bahn” ilə mübahisələrə görə yanvarın 10-da səhər saatlarında üçgünlük tətilə başlayıb.
AZƏRTAC Avropa mediasına istinadla xəbər verir ki, tətil cümə günü saat 18:00-dək davam edəcək. Bu səbəbdən ölkədə şəhərlərarası və şəhərdaxili dəmiryolu nəqliyyatı iflic vəziyyətinə düşüb. Hazırda uzun məsafəyə gedən qatarların təxminən 20 faizi xəttə çıxıb, Berlində və digər şəhərlərdə isə bir çox regional və şəhərətrafı qatarlar işləmir.
Etirazçılar maaşlarının artırılmasını və növbəli işçilərin iş vaxtının əməkhaqqı azaldılmadan həftədə 38 saatdan 35 saata endirilməsini tələb edir. “Deutsche Bahn” isə bunun mümkün olmadığını bildirir.
Bölmənin digər xəbərləri
