ALMANİYANIN İŞGÜZAR DAİRƏLƏRİ QAZAXISTAN İQTİSADİYYATINA MARAQ GÖSTƏRİRLƏR
Qazaxıstanda rəsmi səfərdə olan Almaniya Federativ Respublikasının kansleri Gerhard Şröderin Prezident Nursultan Nazarbayev ilə görüşündə iki ölkə arasında ticarət-iqtisadi əlaqələrin genişləndirilməsi, beynəlxalq siyasətin aktual problemləri, beynəlxalq terrorizmlə mübarizə və başqa məsələlər müzakirə edilmişdir.
N.Nazarbayev Almaniyanın Avropada Qazaxıstanın əsas ticarət-iqtisadi tərəfdaşlarından biri olduğunu bildirmiş, bu ölkənin işgüzar dairələrinin Qazaxıstan iqtisadiyyatına marağını yüksək qiymətləndirmişdir.
Söhbət zamanı qeyd olunmuşdur ki, Qazaxıstan Xəzərin karbohidrogen ehtiyatlarının işlənilməsində alman şirkətlərinin daha geniş iştirakına şərait yaratmağa hazırdır. Almaniyanın neft-mədən avadanlığından Qazaxıstanın neftçıxarma sənayesində istifadə etmək də nəzərdə tutulmuşdur. Qazaxıstanda neft kimyası, tikinti, nəqliyyat və kommunikasiya, maşınqayırma, sığorta, tibb xidməti, gələcəkdə isə kənd təsərrüfatı sahələrində birgə müəssisələr yaradılması üçün də yaxşı şərait olduğu vurğulanmışdır.
Görüşdə mədəni-humanitar əməkdaşlıq, etnik almanların miqrasiyası məsələsi də müzakirə olunmuş, son dövrdə almanların Qazaxıstandan Almaniyaya köçməsinin xeyli azaldığı bildirilmişdir.
Bölmənin digər xəbərləri
