Almaniyanın Münster şəhərində Anım Günü ilə bağlı tədbir keçirilib
Berlin, 29 sentyabr, AZƏRTAC
Almaniyanın Münster şəhərində 27 Sentyabr - Anım Günü ilə bağlı tədbir təşkil olunub. Diasporla İş üzrə Dövlət Komitəsinin dəstəyi ilə fəaliyyət göstərən Həftəsonu məktəbində keçirilən xüsusi dərsin təşkilinə Avropa Azərbaycan Mərkəzi və Almaniya Azərbaycanlıları Alyansı dəstək göstərib.
AZƏRTAC xəbər verir ki, tədbirdə Azərbaycanın Dövlət Himni səsləndirilib, qəhrəman şəhidlərimizin əziz xatirəsi bir dəqiqəlik sükutla yad edilib.
Avropa Azərbaycan Mərkəzinin sədri Zaur Əliyev tədbirdə çıxış edərək sentyabrın 27-də başlayan 44 günlük Vətən müharibəsinin Azərbaycan tarixinin ən şərəfli və parlaq səhifələrindən biri olduğunu diqqətə çatdırıb. Bildirib ki, məhz bu tarixdə başlayan əks-hücum əməliyyatı Ermənistan ordusunun tam məğlubiyyəti və Azərbaycanın parlaq Qələbəsi ilə nəticələnib. Zaur Əliyev gənclərə faktlara əsaslanan bilik, media savadlılığı və mədəni ünsiyyət çağırışı edərək, vurğulayıb ki, Həftəsonu məktəbi milli-mənəvi dəyərlərimizin təbliğ olunduğu və vətəndaş məsuliyyətinin formalaşdığı mühüm platformadır.
Tədbirdə müğənni və ictimai fəal İlahə Fəda gənclərə milli-mənəvi dəyərlərin qorunması, Eldar Güneyli gənclərin müharibənin səbəb və nəticələri barədə faktlar əsasında düzgün məlumatlanmasının önəmini vurğulayıb.
Sonra şagirdlər tərəfindən Azərbaycana həsr olunmuş şeirlər səsləndirilib.
Tədbirin dərs hissəsində pedaqoji heyət mövzunu yaş qruplarına uyğun metodika ilə təqdim edərək 27 Sentyabr - Anım Gününün mahiyyətini, Vətən müharibəsinin gedişini və uğurlu nəticələrini izah ediblər. Vurğulanıb ki, Vətən müharibəsində şanlı Qələbə dövlətin siyasi iradəsi, qətiyyətli diplomatiya və peşəkar ordunun sarsılmaz vəhdəti sayəsində qazanılıb. Eyni zamanda, Prezident, Müzəffər Ali Baş Komandan İlham Əliyevin qətiyyətli addımları, beynəlxalq hüquqa əsaslanan mövqeyi və müharibədən sonrakı bərpa-quruculuq prosesinə uzaqgörən və sistemli yanaşmasının önəmi xüsusi qeyd edilib, bu modelin gənclər üçün intizam, məsuliyyət və strateji düşüncə nümunəsi olduğu bildirilib.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
