Kimya İnstitutu qarşıdakı dövr üçün yeni strateji hədəflər müəyyənləşdirib
Bakı, 2 oktyabr, AZƏRTAC
Elm və Təhsil Nazirliyinin Kimya İnstitutu fundamental və tətbiqi kimya sahəsində elmi tədqiqatların inkişaf etdirilməsi, innovativ texnologiyaların yaradılması və ölkənin texnoloji inkişafına töhfənin artırılması istiqamətində fəaliyyətini yeni strateji hədəflər əsasında davam etdirir.
Bu barədə AZƏRTAC-a açıqlamasında Kimya İnstitutunun Strateji inkişaf, qiymətləndirmə və monitorinq sektorunun müdiri Sevinc Həsənova söyləyib.
S.Həsənova bildirib ki, yeni strateji inkişaf planında institutun elmi potensialının daha səmərəli şəkildə reallaşdırılması, fundamental və tətbiqi tədqiqatların beynəlxalq standartlara uyğun aparılması, elmi nəticələrin praktiki tətbiq imkanlarının genişləndirilməsi əsas istiqamətlərdən biridir. İnnovativ texnologiyaların yaradılması, ölkənin texnoloji inkişafına töhfə verilməsi və yüksəkixtisaslı elmi kadrların hazırlanması prioritetlər sırasındadır. Bununla yanaşı, elmi nəticələrin sənaye və iqtisadiyyatın müxtəlif sahələrində tətbiqinə, elm və istehsal arasında əlaqələrin gücləndirilməsinə xüsusi diqqət yetiriləcək. Kimya İnstitutu qarşıdakı dövrdə Azərbaycanın kimya elminin aparıcı mövqeyinin qorunmasını və daha da möhkəmləndirilməsini, Cənubi Qafqazın aparıcı elmi-tədqiqat institutlarından birinə çevrilməyi hədəfləyir. Bu məqsədlə beynəlxalq elmi əməkdaşlığın genişləndirilməsi, tədqiqatların beynəlxalq elmi mühitə inteqrasiyasının gücləndirilməsi və institutun beynəlxalq elmi platformalarda təmsilçiliyinin artırılması nəzərdə tutulur. Yeni strateji istiqamətlər çərçivəsində beynəlxalq elmi reytinqlərdə mövqelərin gücləndirilməsi, elmi nəşrlərin kəmiyyət və keyfiyyət göstəricilərinin artırılması, habelə müasir elmi infrastruktur və tədqiqat imkanlarının inkişaf etdirilməsi planlaşdırılır.
Sektor müdiri diqqətə çatdırıb ki, strategiyanın mühüm istiqamətlərindən biri də elmi tədqiqatların nəticələrinin innovativ məhsul və texnologiyalara çevrilməsidir. Bu baxımdan sənayeyönümlü məhsulların hazırlanması, tətbiqyönümlü tədqiqatların genişləndirilməsi və elmi nəticələrin real sektora transferi diqqət mərkəzində olacaq. Yeni strateji yanaşma yalnız elmi göstəricilərin artırılmasını deyil, həm də institusional inkişafın, idarəetmə və qiymətləndirmə mexanizmlərinin təkmilləşdirilməsini nəzərdə tutur. Elmi fəaliyyətin nəticələrinin mütəmadi monitorinqi və qiymətləndirilməsi qarşıya qoyulan hədəflərin icrasının effektivliyinin müəyyənləşdirilməsinə imkan verəcək.
“İnstitutun fəaliyyətində bərabərlik, elmi dəyərlərə sadiqlik, dayanıqlılıq, şəffaflıq, elmin inkişafı, akademik dürüstlük və hesabatlılıq əsas dəyərlər kimi müəyyənləşdirilib. Bu dəyərlər institutun elmi fəaliyyətinin təşkilində, tədqiqatçıların inkişafının dəstəklənməsində, elmi nəticələrin cəmiyyətə və iqtisadiyyata faydasının artırılmasında mühüm rol oynayacaq.
Yeni strateji hədəflərin həyata keçirilməsi nəticəsində Kimya İnstitutunun elmi potensialının daha da gücləndirilməsi, beynəlxalq elmi məkanda mövqeyinin möhkəmləndirilməsi və ölkənin innovasiya ekosisteminə töhfəsinin artırılması qarşıya qoyulan əsas məqsədlərdəndir”, - deyə müsahibimiz fikrini yekunlaşdırıb.
Müxbir - Tünzalə Arazlı
Bölmənin digər xəbərləri
