AMBULATORİYA MƏRKƏZLƏRİ BEYNƏLXALQ STANDARTLARA UYĞUNLAŞDIRILIR
YUNİSEF-in Azərbaycan nümayəndəliyi və Səhiyyə Nazirliyi “Azərbaycanda səhiyyə islahatı” layihəsi çərçivəsində ambulator tibb xidmətinin islahatına başlamışlar. YUNİSEF-in respublikamızdakı nümayəndəliyindən AZƏRTAC-a bildirmışlər ki, birinci mərhələdə 5 rayonda - Salyan, Şərur, Göyçay, Xaçmaz və Şəmkirdə ambulatoriya müalicə müəssisələrinin təlabatını öyrənmək nəzərdə tutulur. Bu rayonların hər birində 15-dək müasir tibb mərkəzi yaradılacaqdır. Mərkəzi rayon xəstəxanalarının ambulatoriya şöbələri isə beynəlxalq standartlara uyğunlaşdırılacaqdır. Cari ilin noyabr ayınadək bu mərkəzlərə bütün lazımi dərmanlar və tibb texnikası gətiriləcəkdir. Tibb işçiləri heyətinə yeni ixtisaslar öyrədiləcəkdir.
Layihədən başlıca məqsəd əhalinin aztəminatlı təbəqələrinə ilkin tibbi xidmət üçün şərait yaratmaqdır. Layihə çərçivəsində səhiyyənin dövlət tərəfindən maliyyələşdirilməsi problemi öyrəniləcəkdir. Hələ ötən ilin oktyabrından həyata keçirilməyə başlamış bu layihənin əsas kreditçiləri Beynəlxalq İnkişaf Assosiasiyası və Azərbaycan hökumətidir.
Bölmənin digər xəbərləri
