AMEA Naxçıvan Bölməsinin əməkdaşlarının 240 elmi məqaləsi işıq üzü görüb
Naxçıvan, 13 iyul, AZƏRTAC
Bu ilin birinci yarısında AMEA-nın Naxçıvan Bölməsinin əməkdaşlarının 10 monoqrafiyası, 5 kitabı nəşr olunub, 240 elmi məqaləsi, 122 konfrans materialı və 1 tezisi dərc edilib, bir xəritə tərtib olunub. Əsərlərdən 3 monoqrafiya, 49 məqalə, 50 konfrans materialı xaricdə nəşr edilib. Məqalələrin 33-ü impaktfaktorlu jurnallarda çapdan çıxıb, bunlardan 7-si Clarivate Analytics (Thomson Reuters) indekslidir.
AMEA Naxçıvan Bölməsinin mətbuat xidmətindən AZƏRTAC-ın Naxçıvan bürosuna bildirilib ki, bu faktlar bölmənin 2021-ci ilin birinci yarısındakı elmi və elmi-təşkilati fəaliyyəti haqqında hesabat iclasında səsləndirilib.
İclasda çıxış edən bölmənin sədri, akademik İsmayıl Hacıyev cari ilin altı ayı ərzində yerinə yetirilən işlər, əldə olunan nailiyyətlərdən bəhs edib. Alim builki göstəriciləri ötən ilin müvafiq dövrü ilə müqayisə edərək əsərlərin kəmiyyət və keyfiyyət göstəricilərində artımın müşahidə olunduğunu diqqətə çatdırıb, ilin ikinci yarısına yönəlik təkliflər irəli sürüb.
Daha sonra AMEA Naxçıvan Bölməsi Aparatının Elm və təhsil şöbəsinin müdiri, aqrar elmlər üzrə fəlsəfə doktoru, dosent Orxan Bağırov bölmənin 2021-ci ilin altı ayı ərzindəki elmi və elmi-təşkilati fəaliyyəti haqqında məruzə edib. Məruzədə qeyd olunub ki, AMEA Naxçıvan Bölməsi hesabat dövrü ərzində Naxçıvan Muxtar Respublikası Ali Məclisinin və Nazirlər Kabinetinin, Azərbaycan Milli Elmlər Akademiyası Rəyasət Heyətinin verdiyi sərəncam, qərar, tapşırıq və tövsiyələri layiqincə yerinə yetirməyə çalışıb.
Bölmənin “Elmi əsərlər” və “Axtarışlar” jurnallarının hər birinin 2 nömrəsi nəşr olunub. Bölmə əməkdaşları ölkə mətbuatında aktivlik nümayış etdirərək çoxsaylı qəzet və internet portallarında məqalələr dərc etdiriblər. Elmi əsərlərin keyfiyyət göstəricilərinin artması ilə əlaqədar olaraq cari ilin 6 ayı ərzində əməkdaşların əsərlərinə 704 istinad qeydə alınıb. İki beynəlxalq səviyyəli qrant layıhəsinin icrası uğurla davam etdirilib.
Diqqətə çatdırılıb ki, Azərbaycan Milli Elmlər Akademiyası prezidentinin məktubu nəzərə alınaraq Naxçıvan Muxtar Respublikası Ali Məclisi Sədrinin tövsiyəsi ilə AMEA Naxçıvan Bölməsində UNESCO səviyyəli “İlandağ” geoparkının yaradılması və onun Qlobal Geoparklar Sisteminə və Ümumdünya İrsi Siyahısına salınması ilə bağlı həyata keçirilən layihə çərçivəsində 3189 kvadrat-kilometr sahəni əhatə edən geopark ərazisinin ümumi, geoloji, geomorfoloji, landşaft, tarix-memarlıq, arxeoloji, biomüxtəliflik xəritələri tərtib edilib və əlavə obyektlər üçün təsdiq edilmiş formada pasportlar hazırlanıb.
Qeyd olunub ki, ötən il noyabrın 7-də keçirilən “Ailə təsərrüfatı məhsulları yarmarkası”nda Naxçıvan Muxtar Respublikası Ali Məclisinin Sədri tərəfindən istehsal olunan məhsul çeşidlərinin artırılması, çaytikanı yağı istehsalına xüsusi diqqət yetirilməsi və “Yaşıl aptek”də satışının təşkil edilməsi ilə bağlı tapşırığının icrasını təmin etmək məqsədilə Biokimyəvi tədqiqatlar laboratoriyasının Ordubad rayonunun Aşağı Əylis kəndində yerləşən ərazisində yeni çaytikanı tingləri əkilib. Bölmənin Nəbatat bağında və Aşağı Əylis kəndindəki ərazisində yeni və məhsuldar meyvə sortlarının əldə edilməsi üçün calaq işləri aparılıb. 16 adda bitki qarışıqlarından dərman paketlərinin hazırlanması, “Şorsu” palçığının istehsalı və satışı işi davam etdirilib.
Hesabat dövründə AMEA Naxçıvan Bölməsi 20-dən çox elm və təhsil mərkəzi və bir çox ölkələrin alimləri ilə sıx elmi əlaqələrdə оlub, səmərəli əməkdaşlıq edib. Bölmədə bir respublika səviyyəli konfrans, 2 muxtar respublika səviyyəli konfrans, bölmə səviyyəli 11 elmi konfrans, 8 tədbir, oxunması zəruri olan 5 kitabın müzakirəsi və 8 təqdimatı keçirilib.
Bildirilib ki, ilin birinci yarısında akademik İsmayıl Hacıyev “Şöhrət” ordeni, “Naxçıvan Muxtar Respublikasına xidmətlərə görə” nişanı, AMEA-nın və Naxçıvan Dövlət Universitetinin Fəxri fərmanları, professor Tofiq Əliyev və kimya elmləri doktoru Bayram Rzayev AMEA Naxçıvan Bölməsinin Fəxri Fərmanı ilə təltif edilib, dosent Fizzə Məmmədova “Beynəlxalq İntellektual Əməkdaşlıq Komitəsi İntellektual Liqası”nın həqiqi üzvü, dosent Günel Məmmədova Hindistanın “Şərqin kimya jurnalı”nın redaksiya heyətinə üzv seçilib, dosent Zeynəb Quliyevanın elmi məqaləsi Rusiya Federasiyasının Ümumrusiya elmi-tədqiqat işləri cəmiyyəti tərəfindən sertifikat alıb və II dərəcəli diploma layiq görülüb.
Bölmədə elmi kadr potensialın artırılmasının diqqət mərkəzində saxlanıldığını deyən Orxan Bağırov yarımil ərzində bir əməkdaşın elmlər doktorluğu dissertasiyasını müvəffəqiyyətlə müdafiə etdiyini, bölmənin Dissertasiya Şurasında 3 fəlsəfə doktorluğu dissertasiyası müdafiəsinin və 2 müzakirənin keçirildiyini bildirib.
Vurğulanıb ki, Naxçıvan Muxtar Respublikası Ali Məclisi Sədrinin Sərəncamına əsasən Naxçıvan Dövlət Universitetinin AMEA Naxçıvan Bölməsinə hamiliyə verilmiş 5 ixtisas üzrə təhsil alan tələbələrin iştirakı ilə seminarlar, açıq dərslər, laboratoriya məşğələləri keçirilib, elmi dərəcəsi olan 50 əməkdaş muxtar respublikanın 29 ümumtəhsil məktəbində 8 fənn üzrə nümunəvi dərslər tədris ediblər. AMEA Naxçıvan Bölməsi ilə Naxçıvan Muxtar Respublikası Təhsil Nazirliyinin birgə həyata keçirdiyi “Sabahın tədqiqatçıları” layihəsi çərçivəsində Naxçıvan şəhərinin ümumtəhsil məktəblərindən 50 şagird bölmə alimləri tərəfindən hamiliyə götürülərək, fərdi və kollektiv şəkildə tədqiqatlara cəlb edilib və uğurlu nəticələr əldə olunub.
Sonda AMEA Naxçıvan Bölməsi Rəyasət Heyətinin üzvlərindən AMEA-nın müxbir üzvləri Tofiq Əliyev, Hacıfəxrəddin Səfərli, Vəli Baxşəliyev və Əbülfəz Quliyev çıxış edərək hesabatı qənaətbəxş hesab edib, Bölmənin daha səmərəli fəaliyyəti ilə bağlı təkliflər irəli sürüblər. Çıxışlarda bu yüksəliş tempinin davamlı olacağına əminlik ifadə olunub.
Bölmənin digər xəbərləri
