Xarici Ölkələrdə Yaşayan Azərbaycanlılarla İş üzrə Dövlət Komitəsindən
AZƏRTAC-a bildirmişlər ki, Türkiyənin Antalya şəhərində təşkil olunmuş Dünya azərbaycanlıları ziyalıları forumu çərçivəsində Amerikada fəaliyyət göstərən Azərbaycan icmalarının da toplantısı keçirilmişdir. Dövlət Komitəsinin sədri Nazim İbrahimov toplantıdakı çıxışında demişdir ki, bu gün ABŞ-da fəaliyyət göstərən Azərbaycan icmaları xalqımızın tarixi və müasir həyatı ilə bağlı həqiqətlərin Amerika ictimaiyyətinə çatdırılması istiqamətində mühüm işlər görür. Lakin bu icmaların bir araya gətirilməsi və onların fəaliyyətinin əlaqələndirilməsi daha ciddi uğurlar qazanmağa imkan verə bilər. ABŞ-da fəaliyyət göstərən Azərbaycan icmaları Amerika-Azərbaycan Assosiasiyaları Assambleyasının yaradılması təşəbbüsü ilə çıxış etmişlər.
Amerika Türk Assosiasiyaları Assambleyasının sədri V.Cengiz bu təşəbbüsün həyata keçirilməsi üçün yardım etməyə hazır olduğunu bildirmişdir.
Toplantıda Assambleyanın təsis konfransının 2006-cı ilin noyabr ayında keçirilməsi qərara alınmışdır. Qurumun nizamnaməsinin hazırlanmasına və təsis konfransının təşkilinə dair təşkilat komitəsi yaradılmışdır.
Toplantıda Azərbaycan icmalarının nümayəndələri ilə yanaşı, Amerika Türk Assosiasiyaları Assambleyasının və ABŞ yəhudi icmasının nümayəndələri də iştirak etmişlər.
