DÜNYA
AMERİKA DİPLOMATI İRAQA ZƏRBƏLƏR ENDİRİLMƏSİ BARƏDƏ
Sinxua agentliyinin yaydığı məlumata görə, ABŞ-ın Orta Şərq üzrə xüsusi nümayəndəsi Entoni Zinni İraqa zərbələr endirilməsinin Fələstin-İsrail münaqişəsinin nizama salınmasına kömək edəcəyi barədə Prezident Corc Buşun fikirlərinə mənfi münasibət bildirmişdir.
E.Zinninin fikrincə, hərbi əməliyyatlar ABŞ-ı Orta Şərqdəki müttəfiqlərindən uzaqlaşdıracaqdır. E.Zinni demişdir: “Bİzə çoxlu düşmən qazanmaq lazım deyil, yəni düşmən etməyə ehtiyac olmayanları düşmənə çevirmək lazım deyildir”. O hesab edir ki, ən düzgünü əvvəlcə danışıqlar yolu ilə Fələstin-İsrail münaqişəsini həll etmək və “Əl-Qayidə” təşkilatını məhv etmək, sonra isə İraqın rəhbəri Səddam Hüseynə zərbələr endirilməsi məsələsinə baxmaqdır. E.Zinni vurğulamışdır ki, ordunun bütün generalları bu mövqedədirlər. Yalnız heç vaxt güllə atmayanlar İraqa qarşı müharibə aparmaq həvəsindədirlər.