Amerikanın “Daily Light” qəzeti erməni təcavüzü haqqında məqalə dərc edib
Vaşinqton, 6 aprel, AZƏRTAC
Amerikanın “Daily Light” qəzeti ABŞ Azərbaycanlıları Şəbəkəsinin üzvü Dürdanə Balakişiyevanın Azərbaycanın Dağlıq Qarabağ regionunda vəziyyətə dair məqaləsini dərc edib. Məqalədə bildirilir ki, Azərbaycan mövqeləri bu ölkənin işğal edilmiş Dağlıq Qarabağ regionunda yerləşdirilən erməni silahlı bölmələri tərəfindən artilleriya atəşinə tutulub. Azərbaycan mövqelərinə hücum Azərbaycan və Ermənistan prezidentlərinin Vaşinqtona səfəri zamanı həyata keçirilib. Qeyd edilib ki, Prezident İlham Əliyev Vaşinqtonda Prezident Barak Obama, vitse-prezident Co Bayden və dövlət katibi Con Kerri ilə görüşüb.
Dövlət katibi C.Kerri Azərbaycanın strateji rolunu və Avropanın enerji təhlükəsizliyinin təmin edilməsinə, habelə terrorizmə qarşı birgə mübarizəyə töhfəsini yüksək qiymətləndirib. C.Kerri bir daha təsdiqləyib ki, ABŞ Azərbaycanın 1994-cü ildə Ermənistan tərəfindən pozulmuş ərazi bütövlüyünü dəstəkləyir. Məqalə müəllifi sonda Ermənistandan BMT Təhlükəsizlik Şurasının 822, 853, 874 və 884 nömrəli qətnamələrinə və beynəlxalq hüququn digər normalarına əməl etməsini tələb etməyə çağırıb.
Məqalə ABŞ Azərbaycanlıları Şəbəkəsinin Amerika ictimaiyyətini erməni təcavüzü və Azərbaycanın Qarabağ regionunda münaqişənin genişlənməsi barədə məlumatlandırmaq üzrə yazılı kampaniyası çərçivəsində dərc edilib.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
