ANAMA: Ağdam rayonunda minaya düşən Fərid Əliyev ciddi xəsarət almayıb
Bakı, 6 avqust, AZƏRTAC
Azərbaycan Respublikasının Minatəmizləmə Agentliyi (ANAMA) əməkdaşının Ağdam rayonunda minaya düşməsi ilə bağlı məlumat yayıb.
ANAMA-nın mətbuat xidmətindən AZƏRTAC-a bildiriblər ki, avqustun 6-da Agentliyin əməkdaşı 1990-cı il təvəllüdlü Əliyev Fərid Əlimusa oğlu Ağdam rayonunun işğaldan azad edilmiş ərazisində xidməti vəzifəsini yerinə yetirərkən piyada əleyhinə mina partlayışı baş verib.
Nəticədə Əliyev Fərid Əlimusa oğlu partlayış zamanı üzərində olan xüsusi qoruyucu geyim və dəbilqə sayəsində ciddi bədən xəsarətləri almayıb. O, hazırda tibbi müayinədən keçirilir.
“İşğaldan azad edilmiş ərazilərin minalarla, partlamamış hərbi sursatlarla, tərkibində partlayıcı olan qurğularla və müharibənin partlayıcı qalıqları ilə yüksək səviyyədə çirklənməsini nəzərə alaraq, təhlükəsiz səfər imkanlarının yaradılacağı müddətədək vətəndaşlarımızdan həmin ərazilərə xüsusi icazə almadan daxil olmamağa çağırırıq”, - deyə ANAMA-nın məlumatında bildirilir.
Bölmənin digər xəbərləri
