Anand və Karlsen beşinci dəfə heç-heçə oynamışlar
Bakı, 18 noyabr (AZƏRTAC). AZƏRTAC Beynəlxalq Şahmat Federasiyasının (FİDE) rəsmi saytına istinadən xəbər verir ki, hindistanlı Vişvanatan Anand və norveçli Maqnus Karlsen şahmat üzrə dünya çempionu adı uğrunda matçın yeddinci partiyasını heç-heçə bitirmişlər.
Yeddi partiyadan sonra Karlsen 4,5:2,5 hesabı ilə irəlidədir. Əvvəlki iki partiya norveçli qrossmeysterin xeyrinə qurtarmışdır. Həmin oyunadək dörd heç-heçə qeydə alınmışdır.
Rəqiblər növbəti dəfə noyabrın 19-da, çərşənbə axşamı görüşəcəklər. Ağ fiqurlarla 22 yaşlı Karlsen oynayacaqdır.
Ümumiyyətlə, 12 partiya planlaşdırılmışdır. Bu partiyalardan sonra hesab bərabər olsa, reqlamentdə tay-breyk keçirilməsi nəzərdə tutulmuşdur.
43 yaşlı Anand 2007-ci ildən dünya çempionu adını daşıyır. Şahmat “tacı” uğrunda indiki matç hindistanlının doğma şəhəri Çennayda keçirilir.
Bölmənin digər xəbərləri
