ANS ŞİRKƏTLƏR QRUPUNUN VİTSE-PREZİDENTİ MİRŞAHİN AĞAYEVİN ÇIXIŞI
-Hörmətli xanımlar və cənablar!
Hörmətli cənab Prezident!
İcazənizlə, “2002-ci ilin adamı” mükafatının təqdim olunması mərasimini açıq elan edim, əvvəlcə, bu mükafat və diplom haqqında qısa arayış verim.
Milli Qəhrəman Çingiz Mustafayev adına Fond və ANS şirkətlər qrupu öz fəaliyyəti sahəsində fundamental nailiyyətləri ilə seçilən, prinsipial vətəndaşlıq mövqeyi nümayiş etdirən şəxsləri xüsusi diplom və mükafatla təltif edir. Əslində bu salonda olanların hər biri potensial nominant ola bilər.
Çingizin adına bitişik “İlin adamı” mükafatı Azərbaycan üçün, onun bir dövlət olaraq dünya sistemində yerinin yuxarı başa çəkilməsi naminə çalışan hər bir vətənpərvər azərbaycanlının haqqıdır. Ona görə ki, Çingiz Mustafayev hər şeydən əvvəl və elə hər şeydən sonra da vətənpərvər idi. O, bu ölkə üçün yaşamağın və həlak olmağın yolunu göstərdi. Həyatını verdi. Əslində hamı həyatını verir. Amma hissə-hissə. Tədricən. Çingiz kimi adamların məziyyəti öz ömrünü birdən və məqamında bağışlamağı bacarmaqdır. Ona görə də Çingiz Mustafayev adına Fond və ANS şirkətlər qrupu “İlin adamı”nın ilk növbədə vətənpərvər məzmununa üstünlük verir. Vətənpərvər olmaq isə təqdim və təlqin olunduğu qədər çətin deyil. Sadəcə, işləmək, öz peşəni, öz dövlətini sevmək, əsl azərbaycanlı olmaq gərəkdir.
Milli Qəhrəman Çingiz Mustafayev adına Fond və ANS şirkətlər qrupu da bu mükafatı məhz ona görə təsis edib ki, insanlarımız daha sürətlə vətəndaşlaşsın, vətəndaş təfəkkürümüz daha çevik bir templə dövlətiləşsin.
Mən indi Azərbaycan dövləti haqqında danışır və nədənsə Yaponiya, Almaniya kimi nəhənglər haqda düşünürəm. İkinci Dünya müharibəsindən sonra bu dövlətlərə bir neçə on illik lazım gəldi ki, dircəlsinlər. Mən qəsdən bu iki dövlətin adını çəkirəm. Çünki onlar müharibədən qalib çıxmamışdılar. Azərbaycan da müharibənin birinci mərhələsindən qalib çıxmayıb. Amma müharibədən sonra bizim ölkədə yatırılan sərmayə, qazanılan iqtisadi sabitlik də faktdır. Əlbəttə, mən ölkədəki vəziyyəti ideallaşdırmaq niyyətindən uzağam. Biz Azərbaycanın layiq olduğu iqtisadi-siyasi göstəricilərə hələ çatmalıyıq. Amma bunun üçün bir neçə nəfərin yox, bütün xalqın işləməsi lazımdır.
Müstəqilliyimizin yaşı az olsa da, biz hamımız özümüzü müstəqil hesab edirik. Bu çox yaxşıdır. Amma Azərbaycanın sözün həqiqi mənasında müstəqil bir nəslə mənsub vətəndaşları 1991-ci ildə doğulub. Bu mənada biz ilk müstəqil vətəndaş təbəqəsini 2007-ci ildə alacağıq. O insanların 16 yaşı olanda. Bu isə qazanclarımızla müqayisədə maraqlı, hətta heyrətamiz görünür.
Dünyanın peşəkar dövlətləri ilə müqayisədə hələ həvəskar kimi gözə dəyərik. Biz həvəskar dövlətimizə baxır, həvəslənir və yavaş-yavaş peşəkar dövlətə çevrilirik. Biz ilin dövləti olmağa ilin adamı olmaqdan keçməklə gedirik. İlin adamı olmaq isə hansısa mücərrəd ilin adamı olmaq demək deyil, ilin hər bir ayının, hər bir günün, bəlkə də hər bir saatının adamı olmaq deməkdir.
Beləliklə, çıxışımın sonunda bir daha bu mükafat və onun stimullaşdırıcı keyfiyyətinə qayıdıram. Milli Qəhrəman Çingiz Mustafayev adına Fond və ANS şirkətlər qrupu həm də eyni qan qrupudur. Necə deyərlər, ortada hüquqi və bir qan qohumluğu da var. Ona görə də mən sözü Milli Qəhrəman Çingiz Mustafayevin qardaşı, ANS şirkətlər qrupunun prezidenti Vahid Mustafayevə verirəm.
Bölmənin digər xəbərləri
