Arif Əsədov: “Sabah”ın “Borussiya Dortmund”a qarşı oyunu qürurverici idi
Bakı, 21 oktyabr, AZƏRTAC
Çempionlar Liqasında iştirak hər bir futbolçu, məşqçi və klub nümayəndəsi üçün böyük təcrübədir. Bu yarışda təşkilatçılıq səviyyəsi, oyunun tempi və rəqiblərin gücü baxımından əldə olunan təcrübə “Sabah”ın inkişafına müsbət təsir göstərəcək.
Bu sözləri AZƏRTAC-a açıqlamasında futbol üzrə Azərbaycan millisinin sabiq baş məşqçisi Arif Əsədov “Sabah”ın UEFA Çempionlar Liqasının liqa mərhələsində Almaniyanın “Borussiya Dortmund” komandası ilə keçirdiyi oyun barədə danışarkən deyib.
Mütəxəssis Azərbaycan çempionunun oyununu yüksək qiymətləndirib və komandanın mübarizə əzmini xüsusi qeyd edib: “Sabah”ın oyunu gözləntilərimizdən də yaxşı oldu. İlk dəqiqələrdə müəyyən həyəcan hiss olunurdu. Rəqibin təcrübəsi və statusu da öz sözünü deyirdi. Lakin qol buraxdıqdan sonra “Sabah” çəkinmək əvəzinə, oyuna diktə etməyə başladı. Qarşılaşmanın sonuna qədər bərabər mübarizə izlədik, hətta bəzi epizodlarda “Sabah” daha üstün görünürdü. Sadəcə, qol imkanlarından istifadə baxımından problemlər var idi. Komanda çox yaxşı oyun göstərdi və oyundan-oyuna onun çıxışında müsbət dəyişikliklər hiss olunur. “Sabah”ın ifasında qürurverici oyun gördük”.
Arif Əsədov bildirib ki, belə səviyyəli rəqiblərlə qarşılaşmalar futbolçulara öz zəif tərəflərini müəyyənləşdirmək imkanı verir: “İdeal komanda yoxdur. Yaxşı cəhət odur ki, “Sabah” bu cür oyunlar keçirdikcə güclü rəqiblərə qarşı çatışmazlıqlarını daha aydın görür. Baş məşqçi, məşqçilər korpusu və rəhbərlik komandanın inkişafı üçün həmin səhvlər üzərində işləyir. Əsas çatışmazlıqlardan biri oyunun təxminən 70-ci dəqiqəsindən sonra tempin aşağı düşməsi idi. Azərbaycan Premyer Liqasının oyun tempi ilə Almaniya çempionatındakı sürət arasında böyük fərq var”.
O, “Sabah”ın növbəti oyunlarda da uğurlu nəticələr qazana biləcəyini düşünür. Əsədovun fikrincə, Dortmund təmsilçisi ilə qarşılaşmada nümayiş etdirilən oyun komandada özünəinamı artıracaq: “Sabah”ın göstərdiyi oyun həm futbol ictimaiyyətində, həm də komandanın özündə inam yaradır. Bu çıxış göstərir ki, komanda növbəti oyunlarda hər bir rəqibdən xal almağa qadirdir. Xüsusilə doğma meydanda azarkeş dəstəyi ilə “Napoli”dən ən azı bir xal ala biləcəklərini düşünürəm. Norveç təmsilçisi “Vikinq” ilə səfər oyununda isə 3 xal qazanmaq da mümkündür. Komandanın çıxışı gələcək oyunlar üçün müsbət təəssürat yaratdı. “Sabah”ın hər rəqibdən xal almağa qadir olduğunu düşünürəm. Komandaya uğurlar arzulayıram”.
Qeyd edək ki, Bakı Olimpiya Stadionunda keçirilən qarşılaşma Azərbaycan təmsilçisinin 1:2 hesablı məğlubiyyəti ilə yekunlaşıb.
Bölmənin digər xəbərləri
