ARTİLLERİYA ATƏŞİ NƏTİCƏSİNDƏ PAKİSTANDA 8 ADAM HƏLAK OLMUŞ, 33 NƏFƏR İSƏ YARALANMIŞDIR
İTAR-TASS-ın verdiyi xəbərə görə, Kəşmirdə sərhəd nəzarət xəttində Hindistan hərbçilərinin artilleriya atəşi nəticəsində Pakistanda son gün ərzində 8 mülki şəxs həlak olmuş, 33 nəfər isə yaralanmışdır. Hindistan tərəfi bazar ertəsi günü Bhimber, Bacvat, Çarva, Qarx və Şakarqarx sektorlarındakı yaşayış məntəqələrini atəşə tutmuşdur. Pakistan batareyaları cavab atəşi açandan sonra artilleriya atəşi kəsilmişdir. Hindistan KİV-lərinin məlumatına görə, Hindistan ordusunun Samba və Ayknor sektorlarındakı bir sıra postları və digər hərbi obyektləri dağılmışdır, hərbi qulluqçular arasında itki vardır. Pakistan tərəfinin mülki əhalisi təhlükəli rayonları tərk edir. Pakistan mətbuatı yazır ki, sərhədyanı yaşayış məntəqələrindəki məktəblər və bazarlar bağlanmışdır, çünki məhz bu obyektlər tez-tez artilleriya, minomyot və pulemyot atəşlərinin hədəfi olur.
Bölmənin digər xəbərləri
