ASAIF ABŞ-ın Oklahoma universitetində Azərbaycan haqqında təqdimat keçirmişdir
Bakı, 18 noyabr (AZƏRTAC). Noyabrın 17-də Xaricdə Təhsil Alan və Məzun Olmuş Azərbaycanlı Gənclərin Beynəlxalq Forumunun (ASAIF) nümayəndələri Emil Eminov və Əbülfəz Hacızadə ABŞ-ın Oklahoma ştatının Oklahoma universitetində Azərbaycan haqqında təqdimat keçirmişlər.
ASAIF-dən AZƏRTAC-a verilən məlumata görə, təqdimatda Azərbaycanın tarixi, mədəniyyəti, incəsənəti haqqında əyani təbliğat materialları, ölkəmizdə gedən yenidənqurma, abadlıq işləri ilə bağlı fotoşəkillər nümayiş etdirilmişdir.
Tədbir iştirakçıları, həmçinin ASAIF-in tarixi, fəaliyyət istiqamətləri, strukturu, həyata keçirilən layihələr haqqında məlumatlandırılmışlar. Eyni zamanda, ölkəmizdə gənclər siyasəti haqqında ətraflı məlumat verilmiş və qeyd edilmişdir ki, bu gün gənclərimiz dövlət idarəçiliyi, iqtisadiyyat, mədəniyyət, idman və digər sahələrdə böyük uğurlara imza atır, Azərbaycanı beynəlxalq səviyyədə ləyaqətlə təmsil edirlər.
ASAIF-in bu təqdimatı etməklə əsas məqsədi Azərbaycan mədəniyyətini, tarixini, incəsənətini bir daha xarici auditoriyaya təqdim etmək, eləcə də Dağlıq Qarabağ münaqişəsi, Xocalı soyqırımı ilə bağlı həqiqətləri dünyaya çatdırmaqdır.
Oklahoma universitetinin tələbə və müəllim heyətinin iştirak etdiyi təqdimat mərasimində bu ali təhsil ocağının rəhbəri də çıxış etmişdir.
Bölmənin digər xəbərləri
