AŞIQ ƏDALƏTİN FRANSADA KONSERTİ
İyunun əvvəllərində İsveçrənin İverdon, İtaliyanın Venesiya, Fransanın Şatiyyon şəhərlərində çıxış edən saz havalarının mahir ifaçısı aşıq Ədalət Nəsibov iyunun 23-də yenidən Fransada- Sən Floran şəhərində konsert vermişdir.
Konsertin fransız aparıcısı dinləyicilərə musiqi alətlərimiz, aşıq sənəti haqqında məlumat vermiş, el sənətkarı aşıq Ədalətin yaradıcılıq xüsusiyyətlərindən, habelə qarmonçalan Aydın Əliyevin ifaçılıq tərzindən danışmış, onu məşhur xanəndə Alim Qasımovun fransız tamaşaçılarına sevdirdiyi muğamların virtuoz ifaçısı adlandırmışdır.
Fransız musiqisevərləri aşıq Ədalətin ifasında “Yanıq Kərəmi” “Koroğlu” və digər saz havalarını, Aydın Əliyevin ifasında “Cahargah”, “Mahur” muğamlarını, oyun havalarını sürəkli alqışlarla qarşılamışlar.
Konsert zamanı Ə. Nəsibovun sazda aşıq Həsən İskəndəri və balabanda Maşallah Şəms ( hər ikisi Cənubi Azərbaycandandır) müşaiyət etmişlər.
Konsertdən sonra aşıq Ədalət Fransanın Beynəlxalq radiosuna müsahibə vermişdir. İstedadlı sənətçimiz Fransadan ABŞ-a qastrol səfərinə yola düşmüşdür.
Əskər Əliyev
AZƏRTAC-ın xüsusi müxbiri.
Strasburq
Bölmənin digər xəbərləri
