Astara qaz kompressor stansiyası istismara qəbul edilmişdir
Bakı, 1 aprel (AZƏRTAC). Astara rayonundakı qaz kompressor stansiyasının tikintisi uğurla başa çatdırılmış və stansiya Dövlət Komissiyası tərəfindən istismara qəbul edilmişdir.
Azərbaycan Respublikası Dövlət Neft Şirkətinin (ARDNŞ) mətbuat xidmətindən AZƏRTAC-a verilən məlumata görə, stansiyada giriş qazının təmizlənməsi, kompressorlarda 2 pillədə sıxılması və soyudulması, miqdarının ölçülməsi və magistral qaz kəmərinə vurulması üzrə bütün zəruri işlər görülmüşdür. Tikinti işləri ARDNŞ-in “Neftqazelmitədqiqatlayihə” İnstitutunun layihəsi əsasında “Azəriqaz” İstehsalat Birliyinin sifarişi ilə “Neftqaztikinti” Tresti tərəfindən həyata keçirilmişdir.
Mövcud Astara qaz kompressor stansiyası Naxçıvan Muxtar Respublikasının (MR) təbii qazla təchizatı məqsədi ilə 2005-ci ildə 2 qaz-turbin mühərrikli kompressor və köməkçi avadanlıqla komplektləşdirilərək istismara verilmişdir. Naxçıvan MR-in təbii qazla təchizatının daha etibarlı təmin edilməsi və Azərbaycan ilə İran arasında bağlanmış müqaviləyə uyğun olaraq qonşu ölkəyə təbii qazın ixracı məqsədi ilə yeni kompressor stansiyasının tikilməsi qarşıya aktual məsələ kimi qoyulmuşdu. Layihənin iki mərhələdə həyata keçirilməsi nəzərdə tutulmuşdur. Birinci mərhələdə altı “10 QKNAM” markalı qaz mühərrikli kompressor aqreqatı quraşdırılmaqla mövcud kompressor stansiyası ilə birlikdə nəql edilən qazın gündəlik həcmi 3,5 milyon kubmetr səviyyəsinə çatdırılmışdır. İkinci mərhələdə kompressor aqreqatlarının sayını 10-dək artırmaqla hər iki kompressor stansiyasının gücünü 5 milyon kubmetrə çatdırmaq nəzərdə tutulur.
Bölmənin digər xəbərləri
