ATƏT 2003-CÜ İLDƏKİ FƏALİYYƏTİ BARƏDƏ MƏRUZƏNİ AÇIQLAMIŞDIR
AZƏRTAC ATƏT-dəki informasiya mənbələrinə istinadla xəbər verir ki, yekun sənəddə ATƏT-in ayrı–ayrı qurumlarının fəaliyyəti, habelə təşkilatın digər beynəlxalq qurumlarla əməkdaşlığının nəticələri hərtərəfli təhlil olunur.
ATƏT-in baş katibi Yan Kubiş Vyanada məruzənin təqdim edilməsi mərasimində demişdir: “2003-cü ildə görülmüş işlərin çox hissəsini “gizli diplomatiya”ya, yaxud regional təhlükəsizliyin təmin olunmasına aid etmək olar”. Onun sözlərinə görə, ATƏT-in ötənilki fəaliyyəti uzunmüddətli məqsədlərə yönəldilmiş və bəzən ictimaiyyətin diqqətini bir o qədər cəlb etməmişdir.
Baş katib bunu da əlavə etmişdir ki, 2003-cü ilin dekabrında ATƏT ölkələri Nazirlər Şurasının Maastrixt görüşündə qəbul olunmuş qərarlar, habelə iqtisadi inkişaf strategiyasına, ətraf mühitin qorunmasına, dini dözümlülüyə və antitraffikinqə aid sənədlər bütün Avropa qitəsinin inkişafı naminə təşkilatın səylərini bundan sonra da əlaqələndirməyə imkan yaradır.
